Il-Viċi President tal-Amerka b’theddida lir-Russja u twissija lill-Ewropa

Il-Viċi President tal-Amerka, JD Vance, avża lir-Russja li hemm ċans li l-Amerka tissanzjona lill-Moska jekk ma jaslux għal ftehim mal-Ukranja għal waqfien mill-ġlied. Fl-istess waqt huwa beżbeż lill-Unjoni Ewropea, għaliex skont hu, għandha tiffinanza aktar lin-NATO.

Vance, li kellu jiltaqa’ mal-President tal-Ukranja Volodymyr Zelensky aktar tard, waqt il-Konferenza tas-Sigurtà f’Munich qal li l-Istati Uniti jistgħu jissanzjonaw lill-Moska, u qed jikkunsidraw ukoll azzjoni militari jekk Putin ma jaqbilx ma’ ftehim għall-paċi li jiggarantixxi l-independenza fit-tul ta’ Kyiv.

“Hemm għodod ekonomiċi ta’ influwenza, kif ukoll għodod militari ta’ influwenza” li l-Amerka tista’ tuża kontra Putin, qal Vance f’intervista mal-Wall Street Journal.

“Hemm numru ta’ formulazzjonijiet, ta’ konfigurazzjonijiet, iżda jimpurtana mis-sovranità tal-Ukranja.”

Madankollu, il-President tal-Istati Uniti Donald Trump, ħasad lill-alleati tal-Amerka, ċempel lill-President Russu Vladimir Putin u ħabbar il-bidu ta’ negozjati biex il-gwerra tal-Ukranja tintemm.

Il-mossa ta’ Trump qanqlet biżgħat fost il-gvernijiet tal-Ewropa li jafu jiġu esklużi mill-ftehim biex jitwaqqaf il-kunflitt, fejn il-ftehim jaf jispiċċa jkun wisq favorevoli għar-Russja u s-sigurtà tal-Ewropa tiġi mminata.

Twissija lill-Ewropa

Waqt li kien qed jindirizza mexxejja politiċi kbar, uffiċjali militari, u diplomati, fil-konferenza ta’ Munich, Vance tenna t-talba ta’ Trump biex l-Ewropa tagħmel iktar biex tissalvagwardja d-difiża tagħha stess.

“Naħsbu li parti kbira minnha dik hi li naraw li l-Ewropa tgħin fil-finanzjar tan-NATO ħalli l-Istati Uniti jistgħu jiffukaw fuq l-isfidi fl-Ażja tal-Lvant,” qal Vance b’referenza sottili għaċ-Ċina.

Qabel ma taw it-taħditiet tagħhom, is-Segretarju Ġenerali tan-NATO Mark Rutte qal li Vance “assolutament kellu raġun” dwar il-ħtieġa tal-Ewropa biex “tistinka iktar” u tagħmel iktar fejn tidħol id-difiża tagħha stess. “Għandna bżonn nikbru f’dak is-sens u nonfqu ħafna iktar,” stqarr Rutte.

'Itemm il-gwerra?' - Zelensky

Il-President tal-Ukranja Volodymyr Zelensky

L-Erbgħa li għadda Trump qal li kellu “telefonata produttiva ħafna” ma’ Putin u li qablu biex jibdew bin-negozjati immedjetament. Wara informa lil Zelensky dwar iċ-ċempila.

Pubblikament, Zelensky kien kordjali dwar iċ-ċempila iżda wissa lill-mexxejja dinjin dwar “li jafdaw lis-stqarrijiet tar-rieda ta’ Putin biex itemm il-gwerra” li bdiet bl-invażjoni tar-Russja fi Frar 2022.

Il-kuntatt ta’ Trump ma’ Putin u d-deskrizzjoni ferriħija tiegħu tal-konverżazzjoni reġġgħet lura snin ta’ politika Amerikana li tqis lill-Kremlin bħala wieħed imwarrab mix-xena internazzjonali wara li r-Russa invadew lill-Ukranja ħabta u sabta.

Is-Segretarju tad-Difiża tal-Amerka Pete Hegseth żied mal-iskumdità tal-alleati Amerikani meta ddikjara li l-Ukranja għandha taqta’ qalbha mill-għanijiet militari tagħha, bħas-sħubija man-NATO u r-ritorn tal-fruntieri tagħha qabel l-2014, meta r-Russja annessat l-Krimea.

Il-Ministru tal-Affarijiet Barranin Annalena Baerbock tenniet dawk il-biżgħat matul il-konferenza tal-Ġimgħa meta qalet, “Il-paċi fittizja, mingħajr il-kelma tal-Ewropej, u l-Ukreni, mhi ħa twassal imkien.”

“Paċi fittizja mhix ħa ġġib sigurtà dejjiema, lanqas għall-poplu Ukren jew għalina fl-Ewropa jew għall-Istati Uniti. U għalhekk huwa daqstant importanti li issa qed ikollna taħditiet intensivi ma’ sħabna Amerikani u internazzjonali fil-Konferenza tas-Sigurtà f’Munich.”

Rutte qal li ħa jiddiskutu kif “insaħħu kemm jista’ jkun lill-Ukranja meta jibdew in-negozjati”. Huwa qal ukoll li hemm bżonn ta’ “paċi dejjiema (u Putin) ma jerġax jazzarda.”

Il-Ħamis Trump qal li uffiċjali Amerikani u Russi ħa jiltaqgħu wkoll f’Munich il-Ġimgħa, u li l-Ukranja kienet mistiedna. Iżda Kyiv qalet li mhix tistenna li ħa tinnegozja mar-Russja fil-konferenza.

L-ebda uffiċjal Russi ma ġie mistieden għall-konferenza, iżda dak ma jfissirx li ma jistax ikun laqgħa xi mkien ieħor f’Munich.

Bħala senatur, Vance esprima xettiċiżmu dwar l-għajnuna tal-Amerka lill-Ukranja. Waqt poddata fl-2022, huwa qal: “Ma tantx jimpurtani jiġri x’jiġri mill-Ukranja.”

Is-Segretarju tal-Istat Amerikan Marco Rubio suppost kellu jattendi l-laqgħa f’Munich ma’ Zelensky ukoll, iżda mhix ċara huwiex ħa jlaħħaq wara li l-ajruplan tiegħu kellu jirritorna Washington wara problema mekkanika.

Attakk il-Chernobyl

Il-lejl ta’ qabel il-konferenza, ir-Russja kompliet bl-attakki tagħha fuq l-Ukranja, fejn permezz ta’ dron splussiv laqtet l-ilqugħ tar-raba’ unità tal-provista tal-enerġija tal-Impjant tal-Enerġija Nukleari ta’ Chernobyl.

Dan intqal mill-President tal-Ukranja Volodymyr Zelensky fuq X, fejn ukoll xerred filmat tal-attakk u tal-ħsarat ikkawżati.

Last night, a Russian attack drone with a high-explosive warhead struck the shelter protecting the world from radiation at the destroyed 4th power unit of the Chornobyl Nuclear Power Plant.

This shelter was built by Ukraine together with other countries of Europe and the world,… pic.twitter.com/mLTGeDYgPT

— Volodymyr Zelenskyy / Володимир Зеленський (@ZelenskyyUa) February 14, 2025

Huwa akkuża li r-Russja ma jimpurtahiex mis-sigurtà, għall-kuntrast tal-Ukranja, l-Amerka, u l-pajjiż Ewropej li flimkien bnew dak l-ilqugħ. “Din hija theddida terroristika lid-dinja kollha,” stqarr Zelensky fuq X.

Minkejja l-ħsarat sinifikanti fuq l-ilqugħ, Zelensky stqarr li s’issa l-livelli ta’ radjazzjoni nukleari għadhom ma telgħux—iżda hemm monitoraġġ kontinwu ta’ dawk l-istess livelli.
Huwa tenna t-twissija tiegħu biex ir-Russja ma tiġix fdata: “kull lejl ir-Russja qed tagħmel attakki ta’ dat-tip fuq l-infrastruttura u l-bliet Ukreni. Ir-Russja qed tkompli tespandi l-armata tagħha”.

Kompla billi jgħid li dan juri biċ-ċar li r-Russja mhix lesta għan-negozjati u li lesta biex tkompli tqarraq bid-dinja. Tenna wkoll il-bżonn biex l-alleati tal-Ukranja għandhom jagħmlu pressjoni fuq ir-Russja.

“Ir-Russja għandha tinżamm akkontabbli għall-azzjonijiet tagħha,” temm il-kitba tiegħu fuq X.