Ċirku ta' kriminali li serqu mal-$100 miljun jitkisser bl-involviment tal-Pulizija Maltija

Total ta' tmien kriminali kienu arrestati nhar id-9 ta' Frar wara investigazzjoni internazzjonali - li kienet tinkludi wkoll lill-Korp tal-Pulizija Malti - dwar serje ta' attakki magħrufin bħala 'sim-swapping' u li kellha fil-mira diversi vittmi ta' profil għoli fl-Istati Uniti.  Dawn l-arresti fil-fatt isegwu arrest ieħor f'pajjiżna u ieħor fil-Belġju ta' membri li huma parti mill-istess xibka kriminali. 

Dawn l-attakki orkestrati minn din ix-xibka ta' kriminali kellha fil-mira eluf ta' vittmi matul l-2020, inkluż influencers, stilel tal-isports, mużiċisti u l-familji tagħhom.  Huwa mifhum li b'kollox il-kriminali serqu iktar minn $100 miljun fi cryptocurrencies wara li illegalment serqu l-aċċes għall-mowbajls ta' dawn il-vittmi.

L-investigazzjoni kienet waħda konġunta bejn l-awtoritajiet tar-Renju Unit, il-Belġju, l-Istati Uniti, Malta u l-Kanada. 

Din l-investigazzjoni bdiet fir-Rebbiegħa tal-2020 u kixfet kif xibka ta' madwar tnax-il kriminal, ħadmu flimkien għall-aċċess tan-numri tal-mowbajl tal-vittmi u ħadu kontroll tal-apps u l-accounts billi biddlu l-password.  Dan iffaċilità s-serq ta' flus, cryptocurrency u informazzjoni personali.  Dan it-tip ta' reat huwa msejjaħ sim-swapping għaliex essenzjalment jisraq is-SIM ta' mowbajl u jgħaddi n-numru lil SIM li hija ta' membru taċ-ċirku kriminali.