Attivisti ambjentali u gruppi ta’ residenti ikkundannaw is-sanzjonar ta’ bini illegali mill-Awtorità tal-Ippjanar minkejja sentenzi tal-qorti li kienu revokaw il-permessi oriġinali.
Fuq it-taraġ tal-Kastilja, l-attivisti qalu li l-PA reċentement sanzjonat żvilupp minn Joseph Portelli, il-magnat tal-kostruzzjoni f'Għawdex, minkejja li l-qorti kienet revokat il-permess minħabba ksur ta’ regolamenti tal-ippjanar.
Huma qalu li hemm tliet żviluppi oħra illegali marbuta ma’ Portelli, li wkoll kellhom il-permessi tagħhom revokati mill-qorti, li għadhom qed jistennew li jiġu sanzjonati. Wieħed mill-każijiet pendenti jirrelata ma’ pools ODZ f’Għajnsielem.
Dawn l-avvenimenti qed jikkontribwixxu għall-erosjoni tad-“drittijiet ftit li għad baqa’ lin-nies biex iżommu lill-awtoritajiet responsabbli”, qalu l-attivisti, iżommu kartelluni bil-kliem ‘saltna tad-dritt’ imħassar u minflok il-kliem ‘liġi tal-iżviluppaturi’.
Proċeduri ta’ sanzjonar huma maħsuba għal każijiet fejn strutturi jikkonformaw mal-politiki eżistenti. Iżda, f’dawn l-erba’ każijiet, is-sentenzi tal-qorti kienu ċari li ma jikkonformawx. “Il-proċessar u l-approvazzjoni tal-applikazzjonijiet minn naħa tal-PA qed idgħajfu l-proċess kollu tal-ippjanar u l-ġustizzja, billi jduru għal proċedura fittizja fejn il-liġijiet, ir-regolamenti, u anke s-sentenzi tal-qorti qed jiġu injorati biex jogħġbu lill-iżviluppaturi,” qalu l-attivisti.
L-attivisti sejħu dan bħala skandlu, u qalu li dawn l-aħħar avvenimenti huma intrinsikament marbuta mar-riforma li qatt ma ġiet implimentata biex tipposponi kwalunkwe kostruzzjoni sakemm jiġu eżawriti l-mezzi kollha legali ta’ appell. Kif inhuma l-affarijiet illum, l-iżviluppaturi jistgħu jibdew jibnu malli jingħata permess anke jekk ikun qed jiġi appellat.
Il-bini f’Għajnsielem u Sannat, fost ħafna oħrajn, tlestew qabel il-permessi tagħhom ġew revokati mill-qorti.
Il-Prim Ministru Robert Abela wiegħed riforma ta’ din il-liġi f’Mejju tas-sena l-oħra iżda kien biss ilbieraħ, lejliet il-protesta, li l-Ministru tal-Ippjanar Clint Camilleri qal li bidliet legali dalwaqt ikunu ppreżentati lill-Kabinett għall-approvazzjoni.
Ir-riforma jkollha tiġi mressqa fil-parlament u approvata iżda d-dewmien biex timxi ’l quddiem ġustament qanqal tħassib.
“Mhux biss il-Prim Ministru naqas milli jwettaq il-wegħda tiegħu biex jirriforma l-liġi tal-appelli, iżda s-sitwazzjoni marret għall-agħar peress li l-PA issa qed terġa’ tapprova żviluppi li, f’Marzu li għadda biss, ġew ikkundannati bħala illegali mill-qorti,” qalu l-attivisti.
Huma qalu wkoll li l-Eżekuttiv tal-PA Oliver Magro għandu wkoll jerfa’ r-responsabbiltà għall-azzjonijiet tiegħu. “Il-PA mhux tistħi tinjora s-sentenzi tal-Kap tal-Ġustizzja u qed tipproċessa applikazzjonijiet frawdolenti u qarrieqa li wkoll qed jiddikjaraw b’mod falz li l-iżvilupp huwa skont il-politiki eżistenti tal-ippjanar.”
L-NGOs u l-gruppi ta’ residenti talbu lill-Prim Ministru biex iwaqqaf dan kollu u insistew li l-PA għandha “immedjatament tirrifjuta” l-ipproċessar ta’ applikazzjonijiet li jfittxu li jissanzjonaw żviluppi li l-permessi tagħhom kienu kkanċellati mill-qorti.
Fil-protesta kien hemm BirdLife Malta, Din l-Art Ħelwa, Flimkien għal Ambjent Aħjar, Friends of the Earth Malta, Għawdix, Moviment Graffitti, Nature Trust Malta, Ramblers Association Malta, The Archaeological Society Malta, Wirt Għawdex, Azzjoni Tuna Artna Lura, Għaqda Residenti tal-Qrendi, Għaqda Storja u Kultura Birżebbuġa, Marsaskala Residents Network, Marsaxlokk Heritage, Nadur Nadif, Residenti Beltin, Sliema Residents Association u Wirt iż-Żejtun.
