Lura fl-2012, l-eks Ministru għas-Saħħa Joe Cassar kien xtara karozza mingħand Joe Gaffarena li għaliha Gaffarena kien irrifjuta l-ħlas. Minflok, Gaffarena insista li l-flus tal-karozza, minflok lilu, kellhom jingħataw lil Partit Nazzjonalista bħala donazzjoni.
Mal-gazzetta MaltaToday, li ppubblikat din l-istorja, Cassar insista li dan ma kienx rigal għaliex, "Jiena xorta ħallast għaliha." L-MP Nazzjonalista żied jgħid li, " Gaffarena, li kien ħabib tal-familja, kien irrifjuta l-ħlas u minflok talab biex dawn nagħtihom donazzjoni lill-PN. Kienet ħarġet ukoll riċevuta għall-flus li kont ħallast."
Minkejja dan, Cassar insista li minbarra dan il-każ, huwa qatta ma ta xejn lil Gaffarena, "la liċenzji għall-pompi tal-petrol, la kumpens f'miljuni għall-propjetà fil-Belt...dawn huma affarijiet li Joseph Muscat u Michael Falzon iridu jwieġbu għalihom."
Kelliem għall-Partit Nazzjonalista qal lil MaltaToday li Cassar kien se jagħti lill-gazzetta kopja tal-istess irċevuta li kien ingħata sal-lum filgħodu, minħabba li sakemm ħarġet il-gazzetta għall-pubblikazzjoni, ma kienx se jkollu aċċèss għad-dokument.
