L-Uffiċċju tal-Awditur Ġenerali (NAO) stabbilixxa li bejn April 2014 u Mejju 2015, il-kirja tal-GWU lill-ARMS kienet tikser il-kuntratt bejn il-Gvern u l-Union, minħabba li l-GWU ma kellha ebda sehem fl-ARMS. Il-fidi taċ-ċens irrenda l-ksur tal-kuntratt inqas ċar minħabba l-perspettivi differenti li esprimew il-Union u l-Dipartiment tal-Proprjeta' tal-Gvern (GPD).
Il-GWU sostniet li, bil-fidi taċ-ċens, il-kundizzjonijiet kollha li jirriżultaw mill-kuntratt mal-Gvern ma baqgħux fis-seħħ, filwaqt li d-Dipartiment sostna mod ieħor. L-NAO hu tal-istess fehma tal-GPD, u jirrikkmanda li d-Dipartiment attivament iqis li jieħu azzjoni legali kontra l-GWU. Apparti dan, l-NAO jħeġġeġ lill-GPD jistabbilixxi, permezz ta’ azzjoni legali, jekk il-kundizzjonijiet tal-kuntratt jibqgħux jeżistu wara l-fidi taċ-ċens, u jekk iva, jieħu azzjoni legali kontra l-Union jew kwalunkwe azzjoni oħra meqjusa xierqa.
Fl-opinjoni tal-NAO, filwaqt li l-GPD qatt ma approva l-kirja, id-Dipartiment m’għamilx biżżejjed biex jevita jew jirrimedja s-sitwazzjoni. Il-GPD sostna li ma kienx jaf bl-arranġament bejn il-GWU u l-ARMS qabel il-każ deher fl-istampa għalkemm korrispondenza miżmuma mill-GPD tindika li l-Union kienet avviċinat lid-Dipartiment dwar il-possibilità li tikri partijiet mill-bini tagħha lil entitajiet governattivi. Skont eksuffiċjal għoli fil-GPD, il-GWU stqarret li ‘l-awtoritajiet pertinenti’ kienu konxji minn dan, iżda l-NAO ma setax jifhem għal kollox din il-kwistjoni, minħabba li d-Dipartiment ma pprovdiex id-dettalji kollha filwaqt li l-Union naqset milli tikkopera. Madanakollu, għalkemm il-GPD ħejja memorandum għas-Segretarju Parlamentari fl-Uffiċċju tal-Prim Ministru (OPM), fejn kien indikat li din il-kwistjoni setgħet tkun riżolta permezz ta’ riżoluzzjoni parlamentari, dan qatt ma għadda għall-approvazzjoni meħtieġa. Sadanittant u minkejja li ma ngħatatx l-awtorizzazzjoni neċessarja, il-Union xorta waħda kriet lill-ARMS. L-unika azzjoni li ħa l-GPD, wara li l-każ deher fl-istampa, kienet li bagħat lill-Union għal kjarifiki dwar il-kirja tal-ARMS. L-NAO qies l-azzjoni tad-Dipartiment bħala insuffiċjenti.
L-NAO stabbilixxa li, apparti mill-ARMS, partijiet oħra mill-bini tal-GWU kienu qegħdin jiġu utilizzati bħala attrazzjoni turistika, restorant, aġenzija tal-ivvjaġġar u aġenzija tal-assigurazzjoni. L-użu ta’ dawn il-partijiet minn Malta 5D u Untours Insurance Agents kienet regolari fid-dawl tal-ishma li l-Union għandha f’dawn il-kumpaniji. Madankollu, l-okkupazzjoni minn Sciacca Grill u Vjaġġi Untours ma kinitx regolari għaliex il-Union ma kinitx l-azzjonista maġġoritarja. Filwaqt li l-NAO huwa ċert mill-irregolarità ta’ Sciacca Grill u Vjaġġi Untours qabel il-fidi taċ-ċens f’Mejju 2015, is-sitwazzjoni hija inqas ċara wara dan l-iżvilupp. Dan l-Uffiċċju huwa tal-fehma li d-determinazzjoni tar-regolarità ta’ din l-okkupazzjoni trid tiġi deċiża permezz ta’ proċeduri legali.
Intant id-Deputat Nazzjonalista Jason Azzopardi staqsa min fil-GWU se jkun qigħed jġorr responsabilta. F'kummenti ma' Net News huwa qal ukoill li l-GWU għamket l-arja bil-Gvern biex setgġet kompliet il-kirjiet
