L-UE mistennija toffri aċċess iktar faċli għall-Viża

L-aġenzija Reuters tard ilbieraħ żvelat kif fil-Pjan ta' Azzjoni li mistenni jkun maqbul dalgħodu fit-tmiem tal-Valletta Summit hemm proposta biex ikun hemm aċċess iktar faċli għall-visas għal persuni ġejjin mill-Afrika. Proposta oħra li l-mexxejja Ewropej mistennijin jaslu għal qbil dwarha hija dik li jitnaqqsu l-ispejjeż għal dawk li jibgħatu l-flus lura l-Afrika, biex b'hekk, skont ir-rapport tar-Reuters, tonqos l-immigrazzjoni lejn l-Ewropa. 

Intant Reuters żvelaw ukoll kif l-UE u l-Afrika mistennijin jaqblu dwar proposta li n-numru ta' studenti u għalliema Afrikani li jipparteċipaw fi programmi ta' skambju ta' programmi edukattivi jirdoppja.