Il-Pn qal illi hekk kif din il-ġimgħa, l-prezz internazzjonali taż-żejt niżel f’livelli li qatt kien fl-aħħar 6 snin, il-familji u n-negozji Maltin u Għawdxin komplew iħallsu fost l-ogħla prezzijiet tal-petrol u d-diesel f’pajjiżna.
Il-PN jgħid li l-prezz tad-diesel f’Malta huwa r-raba’ l-ogħla fit-28 pajjiż tal-Unjoni Ewropea filwaqt li l-prezz tal-petrol huwa l-għaxar ogħla, tant li kemm il-prezz tad-diesel kif ukoll dak tal-petrol huma ogħla mill-medja tal-Unjoni Ewropa. Fil-każ tad-diesel, ikompli jgħid il-PN, hemm 24-il pajjiz mit-28 pajjiż tal-Unjoni Ewropeja li qed igawdu minn prezz irħas minn dak ta’ Malta. Dawn huma l-Ġermanja, Franza, il-Belġju, l-Awstrija, il-Lussemburgu, il-Fillandja, id-Danimarka, l-Irlanda, l-Olanda, l-Estonja, il-Bulgarija, Spanja, il-Polonja, il-Latvja, il-Litwanja, ir-Repubblika Ċeka, is-Slovakkja, l-iSlovenja, il-Ġreċja, il-Kroazja, l-Ungerija, Ċipru, il-Portugal, u r-Rumanija. L-irħas pajjiż huwa l-Lussemburgu bi prezz ta’ 97c/litru filwaqt li dak ta’ Malta huwa 1.26/litru, jiġifieri 29c/litru irħas minn Malta.
Fil-każ tal-petrol hemm 18-il pajjiz mit-28 pajjiż tal-Unjoni Ewropeja li qed igawdu minn prezz irħas minn dak ta’ Malta. Dawn huma l-Ġermanja, l-Irlanda, Franza, l-Awstrija, il-Lussemburgu, l-Estonja, il-Bulgarija, Spanja, il-Polonja, il-Latvja, il-Litwanja, ir-Repubblika Ċeka, is-Slovakkja, l-iSlovenja, il-Kroazja, l-Ungerija, Ċipru, u r-Rumanija. L-irħas pajjiżi huma l-Bulgarija u l-Polonja bi prezz ta’ 1.02c/litru filwaqt li dak ta’ Malta huwa 1.35/litru, jiġifieri 33c/litru irħas minn Malta.
L-istqarrija tal-PN uttemm tgħid li filwaqt li l-familji u n-negozji Maltin qed iħallsu fost l-ogħla prezzijiet tal-fuels fl-Ewropa, Muscat qed idaħħal €7,000 fis-sena fil-but għaliex qed jikri l-karozza personali tiegħu lilu nnifsu.
