Fir-rapport annwali tagħhom dwar l-ekonomija ta’ pajjiżna, l-esperti tal-Fond Monetarju Internazzjonali iddikjarw li l-ekonomija Maltija kibret b’rata ferm ogħla minn mistenni u li l-qgħad waqa’ għal livelli storiċi.
Ir-rapport tal-IMF irreveda ’l fuq l-istima tat-tkabbir fl-2015 minn 3.1 punti perċentwali kif imbassar sena ilu għal 4.3 punti perċentwali llum, jiġifieri reviżjoni ’l fuq ta’ 1.2 punti perċentwali. Skont l-IMF dan kien frott ir-riformi li għamel il-Gvern fl-oqsma tal-enerġija, suq tax-xogħol u s-sistema ġudizzjarja, kif ukoll għal prezzijiet baxxi tal-fjuwil u tnaqqis fir-rati tat-taxxa.
Għall-2016, l-IMF qed ibassru tkabbir ta’ 3.5% għal pajjiżna, meta sa sena ilu kienu qed ibassru tkabbir ta’ 2.7% fl-2016. Ir-reviżjoni ’l fuq tal-andament previst tal-ekonomija Maltija jikkuntrasta bil-kbir mar-revizjoni ’l isfel li l-Fond Monetarju Internazzjonali għamel fit-tbassir dwar it-tkabbir tal-ekonomija mondjali. Minkejja klima internazzjonali aktar negattiva, l-esperti tal-IMF jemmnu li l-ekonomija Maltija se tkompli titjieb aktar milli kien previst qabel. Fejn sena ilu l-IMF kienet qed tbassar rata ta’ qgħad ta’ 6.3% għal pajjiżna, fl-2016 din issa tnaqqset għal 5.4%.
Filwaqt li l-Kap tal-Oppożizzjoni jsostni li l-investiment fl-enerġija m’hawnx bżonnu, l-esperti tal-IMF isostnu li dan il-proġett sejjer itejjeb l-ekonomija ta’ pajjiżna. Fejn skont l-analiżi tal-Oppożizzjoni bħalissa hawn għafsa fil-pagi u nuqqas ta’ konsum, l-IMF qed tbassar li t-tkabbir ta’ pajjiżna ser ikun xprunat minn domanda domestika qawwija. Filwaqt li l-Oppożizzjoni tipprova ddaħħal dubji fuq il-qagħda finanzjarja u ssostni li ser ikollna bżonn bailout, l-IMF tikkonkludi li “the authorities’ proposed pace of fiscal consolidation for 2016-18 is appropriate”. It-tim ta’ ekonomisti internazzjonali li studjaw lil Malta ma rawx il-bozoz ħomor li jara l-Kap tal-Oppożizzjoni, imma sostnew li l-isfida għal pajjizna hija li jżomm il-momentum tal-bidliet ħalli l-ekonomija tagħna tibqa’ b’saħħitha.
Qasam ieħor fejn kien hemm progress skont l-IMF kien ir-ristrutturar ta’ azjendi pubbliċi bħall-Enemalta u l-Air Malta. L-IMF sostniet li l-miżuri li ttieħdu fil-budget fil-qasam tal-pensjonijiet kienu passi fid-direzzjoni t-tajba. L-esperti tal-IMF ħeġġew lill-Gvern biex ikompli bil-ħidma biex itejjeb il-qasam ġudizjarju, jtejjeb l-aċċess għall-kredtu u jżid il-parteċipazzjoni tan-nisa fil-qasam tax-xogħol. Fir-rapport tal-IMF kien hemm ukoll tifħir għat-titjib fil-governanza fiskali u t-tisħiħ tal-istituzzjonijiet pubbliċi.
L-istess bħall-IMF, il-Gvern huwa konvint li, wara li pajjiżna rreġistra tkabbir ekonomiku qawwi, issa huwa ż-żmien li l-ħidma fil-qasam tar-riformi tkompli tirranka ħalli fil-ġejjieni jinħoloq u jinfirex aktar ġid għall-familji tagħna.
