19-il nassab inqabdu jipprattikaw il-"passatemp illegali" tagħhom mill-CABS (Committee Against Bird Slaughter), skont rapport li ħarġet l-għaqda ċivili kontra l-qtil tal-għasafar fejn ippreżentat ir-riżultati tal-operazzjonijiet tagħha kontra l-kaċċa illegali fir-rebbiegħa ta’ dis-sena.
Minkejja li l-insib huwa kompletament ipprojbit fir-rebbiegħa, it-timijiet tal-CABS xorta waħda rnexxielhom jiffilmjaw numru ta' individwi qed jonsbu.
L-għaqda rnexxielha taqbad lin-nassaba kollha fuq il-post, fejn irrappurtawhom immedjatament lill-pulizija. CABS ukoll faħħret il-ħidma tal-pulizija fejn qalet li fil-maġġoranza tad-drabi, il-pulizija waslet malajr u arrestaw lill-persuni involuti fuq il-post.
Skont ir-rapport, matul l-operazzjonijiet tal-CABS instabu total ta’ 40 mansab, 10 bird callers, u 85 għasfur tal-għana ħaj. Id-19-il nassab ġew identifikati u se jittellgħu l-qorti.
Fost l-akkużati, nassab minnhom kien diġà ġie rrappurtat mill-CABS fl-2019 għall-istess reat, kif ukoll talli espona ruħu quddiem il-membri tal-għaqda u pprova jsuq fuqhom bil-karozza tiegħu. Minkejja li kien ittella' l-qorti, it-testimonjanzi ntilfu u l-każ ġie preskritt.
“Nittamaw li ma jkunx hemm żbalji fil-perkors tal-ġustizzja did-darba,” qalet Fiona Burrows, Uffiċjal tal-Kriminalità fil-Wildlife fi ħdan CABS.
Barra minn hekk, CABS qalet ukoll li ħafna min-nassaba li nqabdu jonsbu illegalment kienu qed jerġgħu jużaw siti rreġistrati bħala "stazzjonijiet tal-insib" bħala parti mill-proġett kontroversjali tar-“riċerka fuq l-għasafar tal-għana” li jaqa' taħt It-Taqsima tar-Regolamentazzjoni għall-Għasafar Salvaġġi (WBRU) tal-Gvern.
Skont Axel Hirschfeld, l-Uffiċjal għall-Istampa tal-CABS, dan il-proġett mhu xejn ħlief “paraventu biex jipproteġu u jikkuntentaw lin-nassaba sabiex jixtrulhom il-voti.”
CABS għalqet billi kkonfermat li t-timijiet tagħhom se jibqgħu preżenti f’Malta u Għawdex sal-aħħar tal-istaġun f’Mejju, bil-għan li jkomplu jiġġieldu kontra l-insib u l-kaċċa illegali.
