Il-Ministru għat-Trasport u l-Infrastruttura Joe Mizzi qal li l-Kottonera u s-subborg tagħha, il-Kalkara, illum qed jiġbdu aktar nies, li sa ftit tas-snin ilu, kienu jiddarrsu jersqu lejn dawn l-inħawi. Illum, grazzi għax-xogħol li qed isir mill-Uffiċċju tal-Proġetti għar-Riabilitazzjoni u l-Kumitat għar-Riabilitazzjoni tal-Kottonera, fi ħdan il-Ministeru għat-Trasport u l-Infrastruttura, il-poplu Malti qed japprezza u għandu ħeġġa akbar biex jitgħallem aktar dwar il-binjiet, l-istorja u d-drawwiet li ħallewlna missirijietna.
“Dan ikompli jkattar l-impenn min-naħa tal-Gvern biex iwettaq aktar xogħlijiet ta’ tisbiħ u riabilitazzjoni f’dawn il-lokalitajiet,” qal il-Ministru Joe Mizzi meta lbieraħ nieda t-tieni sensiela ta’ laqgħat ta’ informazzjoni bit-tema Wirt il-Kottonera – Wirt Pajjiżek. Dan wara li l-ewwel sensiela li saret is-sena li għaddiet, intlaqgħet tajjeb ħafna mill-pubbliku u kien hemm domanda kbira biex jerġgħu jiġu organizzati.
Il-Ministru Joe Mizzi ta’ rendikont tal-proġetti ta’ riabilitazzjoni li saru u li huma ppjanati fil-Kottonera u fil-Kalkara, fosthom ix-xogħol ta’ restawr li qed isir fil-kjostru tal-Kunvent tad-Dumnikani tal-Birgu u x-xogħol ta’ restawr ippjanat fuq il-lanterna tal-Knisja tal-Lunzjata.
Il-Ministru qal li f’Bormla, kważi tlesta x-xogħol ta’ restawr fuq il-Knisja ta’ Santa Tereża u se jinbeda x-xogħol dalwaqt fuq il-każin tal-Banda ta’ San Ġorġ.Huwa ħabbar ukoll li fl-Isla, tlesta x-xogħol biex ħajt ħdejn dak li huwa magħruf bħala Boiler Wharf jitneħħa u floku jsir ċint b’railing tal-metall fuqu. Barra minn hekk, tħabbar li se jingħata bidu għal restawr fuq il-koppla tal-knisja ta’ Marija Bambina u l-faċċati tal-Knisja ta’ San Ġiljan.
Xogħlijiet oħrajn huma r-restawr fuq it-taraġ taz-zuntier tal-Knisja ta’ San Lawrenz u fil-Kalkara, qed jitfassal pjan ta’ riġenerazzjoni fiż-żona ta’ Triq Marina u restawr fiċ-ċimiterju ta’ Wied Għammieq.
