Il-Kap tal-Oppożizzjoni Simon Busuttil, iktar kmieni dalgħodu bagħat ittra lill-President, Marie Louise Coleiro Preca, bħala 'kustodju tal-Kostituzzjoni ta' Malta' fejn fiha, talab li jiġu verifikati l-ħatriet tal-Maġistrati l-ġodda, Ingrid Zammit Young u Caroline Farrugia Frendo.
Dwar Ingrid Young, Busuttil saħaq li din mhix eliġibbli għall-kariga minħabba li skont artiklu fil-Kostituzzjoni, din il-ħatra ma tistax isseħħ jekk il-persuna tkun okkupat kariga pubblika fl-aħħar tliet snin. F'dan il-każ, Young hi ċ-chairperson tal-Kummissjoni dwar l-Impjiegi.
Fl-istess waqt, in-nomina l-oħra ta' Caroline Farrugia Frendo, li tigi bint l-Ispeaker Anglu Farrugia, wkoll qed jintalab li tiġi verifikata mill-Oppożizzjoni. Dan hekk kif fil-kostituzzjoni hemm stipulat li saqbiex persuna tkun tista' tikkwalifika għall-ħatra ta' Maġistrat, trid tkun eżerċitat bħala Avukat għal minn tal-inqas 7 snin, u f'dan il-każ, Busuttil qed jitlob li, "dan hu punt kardinali li għandek tara jekk hux sodisfatt fil-każ ta' Dr. Caroline Farrugia Frendo."
Simon Busuttil kompla biex jitlob laqgħa urġenti mal-President, "in vista ta' dawn il-fatti eċċezzjonali u bla preċedent fl-istorja tal-ħatriet tal-membri tal-ġudikatura ta' pajjiżna."
