Il-Kap tal-Partit Nazzjonalista Simon Busuttil sostna li l-Oppożizzjoni se tkun qed iżżomm mal-Att tal-Protezzjoni tal-Embrijuni. Dan minkejja li l-Partit Nazzjonalista għad irid jieħu pożizzjoni uffiċjali dwar l-iffriżar tal-embrijuni.
Mal-gazzetta Malta Today, Simon Busuttil qal li, "Aħna se nkunu qed inżommu mal-liġi tal-protezzjoni tal-embrijuni li kienet għaddiet fil-Parlament unanimament. L-istatistika qed turi li hi ta' suċċess," meta kien qed jirreferi għal rapport tal-Awtorità għall-protezzjoni tal-embrijun. Dan ir-rapport wera li kien hemm rata ta' suċċess ta' 28.82% miċ-ċikli kollha li saru fl-2014.
Il-kumment ta' Busuttil kien simili u kważi identiku għal dak li tat ix-shadow minister għas-saħħa, Claudette Buttigieg. Min-naħa l-oħra, meta l-membri tal-Oppożizzjoni ġew mistoqsija dwar dan, huma wieġbu li l-grupp parlamentari kien għad irid jiddiskuti l-kwistjoni.
Intant, il-viċi kap Nazzjonalista Beppe Fenech Adami ikkumenta li m'hemm l-ebda studju xjentifiku li juru li hemm bżonn xi bidliet. " Aħna se nistennew li l-Gvern jitfa' l-proposta tiegħu, imbagħad, nimxu minn hemm," żied jgħid Fenech Adami.
Dan jiġi wara li l-Prim Ministru Joseph Muscat kien qal lill-istess gazzetta li hu kien 'reżolut' fl-għanijiet tiegħu li jintroduċi l-iffriżar tal-embrijuni. Fil-fatt, kumitat inter-ministerjali inħatar sabiex ikun jista' jara s-sitwazzjoni u jevalwa kollox.
