Aktar kmieni llum, il-Viċi Kap għall-Ħidma fil-Partit Nazzonalista u Shadow Minister tal-Intern Beppe Fenech Adami bagħat ittra lill-Kummissarju tal-Pulizija li fiha talbu formalment biex jinvestiga l-iskandlu ta’ Gaffarena u Kastilja. Din it-talba formali saret wara ġimgħat sħaħ ta’ sejħiet fil-media mill-Partit Nazzjonalista biex il-Pulizija tinvestiga dan l-iskandlu.
Waqt konferenza tal-aħbarijiet barra d-Depot tal-Pulizija fil-Floriana, Beppe Fenech Adami qal li mir-rapport tal-Awditur Ġenerali hemm biżżejjed punti li għandhom iwaslu għal investigazzjoni kriminali mill-Pulizija. L-ittra mibgħuta lill-Kummissarju tal-Pulizija ssemmi minn tal-anqas 14-il punt li l-Pulizija għandha tħares mill-qrib lejhom u tinvestigahom.
Barra minn hekk, punt 6.2.16 tar-rapport tal-Awditur Ġenerali jgħid b’mod ċar li d-deals li saru bejn il-Gvern u Gaffarena jista’ jkun li jiksru l-Kodiċi Kriminali. L-Awditur jgħid li hu m’għandux il-mandat biex jagħmel din l-investigazzjoni, iżda jsemmi b’mod partikolari Artikli 133 u 257 tal-Kodiċi Kriminali ta’ Malta.
Il-Viċi Kap tal-Partit Nazzjonalista fakkar li l-għada li ġie pubblikat ir-rapport tal-Awditur Ġenerali, numru ta’ Pulizija ntbagħtu mill-Prim Ministru fid-Dipartiment tal-Artijiet u ngħatat l-impressjoni li kienet bdiet investigazzjoni kriminali dwar il-każ. Dakinhar, l-Oppożizzjoni kienet talbet lill-Kummissarju tal-Pulizija biex jifrex l-investigazzjoni għal Kastilja għaliex jirriżulta ċar li huwa hemm fejn inħema, tfassal u saru t-trattativi dwar dan il-każ.
