Bil-għan li aktar familji Maltin u Għawdxin jibbenefikaw minn enerġija nadifa, l-Uffiċċju tal-Prim Ministru u s-Segretarjat Parlamentari għall-Presidenza UE 2017 u għall-Fondi Ewropej, nidew l-ewwel minn tliet skemi b’valur ta’ €5 miljun il-waħda minn fondi Ewropej, għal sistemi ta’ panelli fotovoltajiċi. Huwa stmat li ftit inqas minn 7,000 familja mistennija tibbenefika minn din l-iskema.
Il-Ministru fl-Uffiċċju tal-Prim Ministru Konrad Mizzi qal li permezz ta’ din l-iskema u aktar skemi fiż-żmien li ġej, pajjiżna ser ikompli jilħaq il-miri tiegħu tal-2020, filwaqt li aktar familji jiggwadanjaw mill-benefiċċji ta’ enerġija nadifa. Huwa mistenni li sal-aħħar ta’ din is-sena se jkollna aktar minn 95 MWp.
Is-Segretarju Parlamentari għall-Fondi Ewropej Ian Borg qal li din l-iskema taqa’ taħt Assi ta’ Prijorita’ 4 u tinkorpora fiha investiment totali ta’ kważi €58 miljun favur enerġija alternattiva u aktar sostenibbli. Huwa spjega li permezz t’allokazzjoni li taqbeż €15-il miljun minn Fondi Ewropej, din is-sejħa partikolari ser tkun qed tfisser investiment sostanzjali f’settur daqstant importanti.
Huwa żied jgħid li s-settur tal-enerġija alternattiva huwa wieħed minn dawk is-setturi fejn il-Kummissjoni Ewropea tesiġi li nkomplu ninvestu dejjem aktar u permezz ta’ din l-iskema, il-Gvern Malti qiegħed jikkommetti ruħu għal tragwardi importanti li jridu jintlaħqu fis-snin li ġejjin u li aħna kunfidenti li nilħqu hekk kif id-domanda għal dawn it-tip ta’ investimenti hija akbar minn qatt qabel.
Din l-iskema se taħdem fuq bażi ta’ ‘first come, first served’ u kull min jikkwalifika taħt din l-iskema se jingħata għotja ta’ 50% tal-valur tas-sistema sa mhux aktar minn €2,300, jew €757 għal kull kilowattpeak. Sistemi li ser ikunu qed isiru taħt din l-iskema se jingħataw feed-in tariff ta’ €0.16c5 għal sitt snin.
L-applikazzjonijiet se jiftħu fit-30 ta’ Mejju 2016 u aktar informazzjoni tista’ tinkiseb minn fuq is-sit www.rews.org.mt jew fuq in-numru 22955000.
![[BIL-FILMAT] Il-Ministru tal-Ġustizzja jagħti ħjiel li ċ-ċittadini se jkollhom jitolbu investigazzjoni tal-pulizija qabel inkjesta maġisterjali](http://content.illum.com.mt/ui_frontend/thumbnail/684/0/whatsapp_image_2025-01-20_at_17.01.58.jpeg)
