Trattament indaqs għall-ekonomiji ż-żghar tal-UE

Waqt laqgħa tal-Kumitat Ekonomiku u Monetarju tal-Parlament Ewropew (ECON), Dr Alfred Sant, iffoka l-intervent tiegħu fuq l-ekonomiji żgħar tal-Unjoni Ewropea.

Sant qal lil Dombrovskis li l-Għaqda Bankarja riesqa lejn il-fażi finali tagħha u hija waħda mill-aktar proġetti rilevanti għaż-żona tal-ewro. L-Ewroparlamentari Malti staqsa lil Dombrovski għal analiżi tal-Għaqda Monetarja.

“Kif qed tippjana li tiżgura li l-banek iż-żgħar fl-ekonomiji żgħar tal-UE, li diġa’ qed jiffaċċjaw sfidi speċifiċi, ma jżidux ir-riskji fis-servizzi finanzjarji fl-ekonomija nazzjonali tagħhom? U speċifikament meta jiġu biex jisilfu lill-intrapriżi żgħar u medji? Teoretikament, il-banek kollha għandhom jiġu ttrattati ndaqs irrispettivament mid-daqs tagħhom u m’għandhomx jitilfu l-kompetittivita’ tagħhom”, qal Sant lill-Kummissarju Dombrovskis.

Dan qalu b’risposta għal kumment tal-Kummissarju Ewropew Valdis Dombrovskis, li qal li ħafna banek żgħar fil-pajjiżi tal-Unjoni Ewropea qed jilmentaw  li l-ħtiġijiet ġodda imposti fuqhom qed jgħabbuhom b’piżijiet sproporzjonati. Dombrovskis qal li beħsiebu jesplora metodi kif dawn il-ħtiġijiet ikunu simplifikati, speċjalment għall-iżgħar banek fl-UE, li d-daqs u l-attivita’ tagħhom huma limitati ħafna.

“Fl-istess waqt, huwa importanti li jkun żgurat li d-deposituri ikunu kunfidenti li l-bank tagħhom – żgħir jew kbir – ikun regolat u supervizjonat.” qal il-Kummissarju Dombrovskis.

Wara r-riżenja tal-Kummissarju Jonathan Hill b’riżultat tal-vot tal-BREXIT, l-ECON iltaqa’ ma’ Valdis Dombrovskis, Viċi President tal-Kummissjoni Ewropea inkarigat mill-Ewro u d-djalogu soċjali b’rabta mat-trasferiment tal-portafoll tal-Istabbilita’ Finanzjarja, Servizzi Finanzjarji u Swieq Kapitali. Il-membri tal-ECON ressqu r-rimarki tagħhom għall-attenzjoni tal-Kummissjarju Dombrovskis.