Il-Kap tal-Partit Demokratiku Marlene Farrugia. qalet li dan il-Partit, li ilu biss disa' xhur imwaqqaf, "għamel suċċess għaliex għall-ewwel darba, x'aktarx se jkun hemm deputati tat-tielet partit fil-Parlament ukoll. Għaldaqstant, min-naħa tal-Partit Demokratiku, inħossuna sodisfatti."
Dwar ir-riżultat tal-elezzjoni, b'mod ġenerali, Farrugia qalet li dan għad irid jiġi analiżżat, iżda "jidher li l-poplu mhux jifhem kemm il-kwistjoni tal-korruzzjoni qed taffettwa l-futur tiegħu u ta' wliedu. Għal ħafna nies, jidher li l-korruzzjoni mhix kwistjoni daqshekk importanti, li dwarha wieħed għandu jbiddel gvern."
Waqt li kienet qed tagħti kumment lill-mezzi tax-xandir fis-sala tal-għadd tal-voti fin-Naxxar, Farrugia, qalet ukoll kif jidher biċ-ċar li l-kwistjonijiet li ġew promossi mill-Forza Nazzjonali, ma kinux importanti daqshekk għall-poplu.
