Jesmar Baldacchino se jinħatar Direttur Informazzjoni tal-PN

Il-Partit Nazzjonalista ħatar lil Jesmar Baldacchino bħala Direttur Informazzjoni tal-partit.

Huwa se jkun qed ikompli fuq il-ħidma ta’ David Bonello li ħalla din il-kariga fil-ġranet li għaddew.

Jesmar Baldacchino għandu 39 sena u ilu jaħdem fis-settur tal-ġurnaliżmu u l-komunikazzjoni għal dawn l-aħħar 20 sena.

Huwa ħadem f’diversi kmamar tal-aħbarijiet fosthom Net Television, RTK u Newsbook. Dan l-aħħar huwa kien fil-kariga ta’ Deputat Editur tal-gazzetta ILLUM. 

Huwa wkoll diplomat fil-Marketing Diġitali u l-Fotografija.

F’esperjenza politika mal-Partit Nazzjonalista, huwa ħadem fl-uffiċċju tar-relazzjonijiet pubbliċi tal-Ministeru għall-Ġustizzja, id-Djalogu Soċjali u l-Familja ta’ Chris Said.

Kiseb ukoll esperjenza fix-xena Ewropea meta ħadem fl-uffiċċju tal-komunikazzjoni mal-Membri Parlamentari Ewropej Therese Comodini Cachia u Francis Zammit Dimech.

Il-kariga ta’ Jesmar Baldacchino bħala Direttur Informazzjoni tal-Partit Nazzjonalista se tidħol fis-seħħ mill-5 ta’ Frar li ġej.