Il-fundatur ta' kumpanija b''rabta' mal-Brexit jingħata ċ-ċittadinanza Maltija
Christopher Chandler minn New Zealand jidher fil-lista tal-ismijiet al-persuni li xtraw iċ-ċittadinanza fl-2016
minn Albert Gauci Cunningham
Il-Financial Times qed tirrapporta li l-fundatur ta’ kumpanija f’Dubaj b’rabta mal-Brexit ingħata ċ-ċittadinanza Maltija.
Christopher Chandler minn New Zealand, li huwa l-fundatur ta’ Legatum Group jidher fil-lista tal-ismijiet li ppubblika l-Gvern ix-xahar li għadda tal-persuni li xtraw iċ-ċittadinanza fl-2016.
Skont ir-rapport tal-Financial Times, il-kumpanija tal-investimenti Legatum f’Dubaj hija l-kumpanija ewlenija wara l-Fondazzjoni Istitut Legatum, li spiċċat taħt skrutinju minħabba l-pożizzjoni b’rabta mal-Brexit.
Il-Financial Times tgħid li skont figuri tal-2016, il-Legatum Foundation Ltd ipprovdiet £3.9 miljun minn total ta’ £4.3 miljun lil ‘think-take’ li wara l-vot tar-referendum tal-Brexit ingaġġat numru ta’ ewroxjettiċi.
Rapporti oħra dwar Legatum u l-biljunarju Christoper Chandler dehru wkoll fit-Times ta' Londra u gazzetti oħra fir-Renju Unit.
Fil-lista tal-persuni li xtraw iċ-ċittadinanza permezz tal-Programm ta’ Ċittadinanza b’Investiment (IIP) hemm ukoll il-Kap Eżekuttiv ta’ Legatum Mark Stoleson.
Names revealed by the media confirm concerns raised by the opposition in #Malta and MEPs who visited Malta who made specific recommendations on the IIP. It also explains all the secrecy from disclosing names by the government and the need for full transparency. pic.twitter.com/74CK18Nu11
— F Zammit Dimech (@FrancisZD) January 29, 2018
Fi tweet, l-MEP Nazzjonalista Francis Zammit Dimech sostna li l-ismijiet li qed jissemmgħu li xtraw iċ-ċittadinanza tispjega s-segretezza kollha min-naħa tal-Gvern u jisħaq li jkun hawn aktar trasparenza.
Legatum Group ġiet irrappurtata ssostni li x-xogħol tal-Legatum Institute Foundation dwar il-Brexit beda biss wara d-deċiżjoni tar-referendum li r-Renju Unit jitlaq mill-Unjoni Ewropea. Legatum ssostni li wara r-riżultat tar-referendum, l-irwol tal-Fondazzjoni kien dak li jidentifika opportunitajiet ġodda għar-Renju Unit wara t-tluq mill-Unjoni.
Legatum ma rrisponditx lill-Financial Times dwar ix-xiri taċ-ċittadinanza Maltija minn Chandler u Stoleson.
Fir-rapport tad-delegazzjoni tal-MEPs li ġew Malta f’Diċembru dwar is-saltna tad-dritt, fost ir-rakkomandazzjonijiet, jingħad li l-Gvern Malti għandu jippubblika separatament il-lista tal-persuni li jixtru ċ-ċittadinanza bl-IIP u dawk li jingħataw ir-residenza.
L-MEPs jissuġġerixxu wkoll li għandu jsir assessjar tal-IIP u l-proċeduri li qed jittieħdu kontra l-ħasil tal-flus.
Malta iżda huwa l-uniku pajjiż fost dawk li fl-Unjoni Ewropea għandhom skema ta’ ċittadinanza li jippubblikaw l-ismijiet.
