Pierre Portelli, iċ-Ċermen Eżekuttiv tal-midja tal-Partit Nazzjonalista, intalab jidher quddiem il-Pulizija biex ikun mistoqsi dwar l-investigazzjoni li bdiet malli ġew ippubblikati l-konklużjonijiet tal-inkjesta Egrant.
Skont sorsi li tkellmu mal-MaltaToday, Pierre Portelli ntalab biex imur id-Depot nhar it-Tlieta li għadda.
Pierre Portelli, li qabel l-elezzjoni li għaddiet kien l-editur responsabbli mill-kontenut ta’ The Malta Independent, kien xehed quddiem il-Maġistrat Aaron Bugeja u anke kien tah kopja tad-dokumenti li kienu qed jitqiesu bħala l-prova li l-kumpanija fil-Panama hija ta’ mart il-Prim Ministru, Michelle Muscat.
L-inkjesta kkonkludiet li dawn l-istess dokumenti kienu ffabbrikati.
Dwar dan, il-MaltaToday tkellmet ukoll mal-Kap tal-Partit Nazzjonalista Adrian Delia li iżda saħaq li jieħu passi biss fil-konfront ta’ Pierre Portelli jekk ikun investigat.
Insista, li sa issa, ma jidhirx li Pierre Portelli qed ikun investigat u ma għandu l-ebda indikazzjoni li se jkunu qed jittieħu passi kontrih.
Delia fakkar li l-Pulizija jistgħu jsejħu persuni jew bħala suspettati u allura biex ikunu invstigati jew inkella biex jipprovdu informazzjoni u jgħinu fl-investigazzjoni.
“Ma jidhirlix li se jkun investigat iżda jekk dan ikun il-każ immedjatament nagħmel il-kunsiderazzjonijiet tiegħi,” kompla Delia.
Id-Deputat Nazzjonalista Karol Aquilina kien saħaq li jekk tittieħed azzjoni kontra Pierre Portelli jkun każ ta' frame-up.
Ilbieraħ, issejjaħ ukoll quddiem il-Pulizija l-eks uffiċjal tal-FIAU, Jonathan Ferris.
