Il-Grupp Parlamentari tal-PN ilu ma jiltaqa' xahrejn
Tliet Deputati tal-PN ikellmu lill-gazzetta ILLUM. Wieħed mid-Deputati jgħid li hemm biża’ illi l-konverżazzjoni waqt il-laqgħa tkun leaked ... tnejn mid-Deputati jwaħħlu f’Clyde Puli
minn Albert Gauci Cunningham / Yendrick Cioffi
Deputati tal-Partit Nazzjonalista li tkellmu ma’ din il-gazzetta fuq il-kundizzjoni li jibqgħu anonimi sostnew illi l-Grupp Parlamentari ilu ma jiltaqa’ aktar minn xaharejn, ħlief għal darba meta ltaqa’ ta’ malajr għal nofs siegħa biss. Minkejja ilmenti minn deputati tal-PN mal-ILLUM, sorsi mit-tmexxija tal-partit, filwaqt li ma ċaħdux li l-Grupp Parlamentari ilu ma jiltaqa’, insistew illi dan huwa minħabba l-kampanja elettorali għax “din tieħu preċedenza”.
L-ewwel sors, Deputat tal-PN, sostna illi l-aħħar li tlaqqa’ l-Grupp Parlamentari kien ftit iktar minn xahar ilu, preċiżament fil-15 ta’ April meta “l-laqgħa kellha tibda fit-3:00 p.m u minflok bdiet fit-3:30 p.m u damet nofs siegħa biss, sal-4:00 pm.” Is-sors kompla jgħid li dan ġara, “għax uħud mid-Deputati kellhom imorru l-plenarja.”
Qabel din il-laqgħa qasira, qalulna s-sorsi, kien ilu ftit mhux ħażin ma jitlaqqa’ l-Grupp Parlamentari. Xi ħaġa li kompla jgħid illi hija “barra min-normal għax fis-snin ta’ Lawrence Gonzi u Simon Busuttil fit-tmexxija konna niltaqgħu madwar darba fil-ġimgħa.”
Dan id-Deputat qal lill-ILLUM illi nhar il-15 ta’ April id-Deputati tlaqqgħu biss għal nofs siegħa. “Kellna niddikskutu l-mozzjoni dwar il-mina. Fil-fatt ma ddiskutejna xejn u litteralment iddeċidejna kif se nivvotaw ftit qabel ma ttieħed il-vot.”
Dan id-Deputat sostna li hemm biża’ li jitlaqqa’ l-Grupp Parlamentari għax iqumu ċerti kwistjonijiet, kritika u hemm ċans li joħroġ diżgwid serju bejn numru ta’ Deputati u t-tmexxija tal-PN. Sorsi qrib ħafna Adrian Delia qalu li m’hemm “assolutament l-ebda biża’ li jitressaq il-Grupp Parlamentari, sempliċiment bdiet kampanja u din tieħu preċedenza.” Din kienet ir-risposta li ngħatat din il-gazzetta anke jekk baqgħet tfakkar illi l-Grupp baqa’ ma tlaqqax anke qabel April, meta kienet għadha ma bdietx il-kampanja.
“Mela qabel konna niltaqgħu darba fil-ġimgħa. Issa nidħlu fil-Parlament u lanqas inkunu nafu x’se ngħidu fuq is-suġġett. Kulħadd ta’ dak il-ħin.”
It-tieni sors, deputat ieħor tal-PN, filwaqt li kkonferma dak kollu li qal l-ewwel sors fir-rigward ta’ nuqqas ta’ laqgħat, ma qabilx dwar ir-raġuni għalfejn mhux qed jitlaqqa’ l-Grupp Parlamentari.
“Ma naħsibx li hija biża’. Naħseb li mhux qed niltaqgħu sforz nuqqas ta’ pjan u strateġija. Il-problema mhux Delia,” sostna dan id-Deputat, “il-problema huma n-nies ta’ madwaru speċjalment Clyde Puli.”
Intant Deputat ieħor tal-PN li tkellem ma’ din il-gazzetta, reġa’ mill-ġdid ikkonferma dak kollu li qalu l-ewwel Deputat qablu. Dan iżda saħansitra sostna li jista’ jkun hemm biża’ illi xi ħadd jieħu rekording tal-laqgħa u jgħaddiha lill-midja.
Dan is-sors qal illi Delia mhux il-problema “għax jekk ikun hemm bżonn se jsib ħin biex ikellmek, Delia huwa raġel tan-nies. Għalhekk naraha stramba jiena li mhux qed jitlaqqa’ l-Grupp Parlamentari.”
L-istess sors iżda qal li l-problema hija li Delia mhux qed jiltaqa’ ma’ min qed jagħmillu l-ħsara. “Meta ma jlaqqax il-Grupp Parlamentari qed jitfa’ l-ħatab fuq in-nar biex ikollhom aktar xi jgħidu. Clyde Puli huwa kollox,” jerġa’ jgħid dan id-Deputat f’eku għal dak li qal deputat qablu lill-ILLUM. “Ma tantx iħobb jiddelega d-deċiżjonijiet. L-aħħar kelma hija tiegħu. Kważi, kważi ngħidlek li hu jmexxih il-Partit, l-aħħar kelma dejjem tiegħu u Delia joqgħod ħafna fuq il-kelma tiegħu,” sostna s-sors.
Minkejja li ma stajniex nagħmlu kuntatt ma’ Puli, persuni qrib tiegħu ċaħdu u sostnew illi mhu vera xejn li s-Segretarju Ġenerali tal-PN mhux qed iħalli laqgħat isiru. “Id-diskussjoni qed issir mela u kieku jinqala’ xi ħaġa urġenti niltaqgħu. Id-diskussjonijiet dwar il-mina, pereżempju, ħadu sigħat twal. L-ewwel id-diskussjoni ssir fost dawk li qed jieħdu ħsieb is-suġġett (Shadow Ministers) imbagħad jersqu għand il-Grupp Parlamentari bil-proposta li tiġi approvata jew le.”
Il-Grupp Parlamentari huwa fejn Delia sab l-aktar reżistenza kemm ilu Kap tal-PN, fil-fatt kienet din il-gazzetta stess u s-sit illum.com.mt li żvelaw illi saħansitra kienu qed jinġabru firem fil-Grupp Parlamentari biex Delia jitneħħa minn Kap, xi ħaġa illi eventwalment falliet. Kienet din il-gazzetta u s-sit ukoll illi żvelaw kif ir-reżistenza kibret wara filmati ta’ Delia f’argument privat u familjari. Konna żvelajna illi bosta fil-partit, inkluż ħafna fil-Grupp Parlamentari, għalissa qed jistennew u jibqgħu kwieti biex ħadd ma jwaħħal fihom għat-telfa tal-PN nhar is-26 ta’ Mejju, iżda mbagħad jerġgħu jaħdmu b’forza biex Delia (jew xi nies madwaru) jitneħħew f’każ ta’ telfa qawwija.
