Sqalli li jmexxi ċirku tat-traffikar tad-droga arrestat f'San Pawl il-Baħar

Il-pulizija Maltija arrestat Sqalli ta' 39 sena minħabba l-konnessjonijiet tiegħu ma’ organizzazzjoni tat-traffikar tad-droga fi Sqallija. Il-Pulizija qalet li l-arrest sar wara li nħareġ mandat ta' arrest Ewropew għall-Isqalli, li l-midja Taljana identifikat bħala l-kap ta’ organizzazzjoni kriminali bbażata f’Sirakuża.

Huwa kien ilu jaħrab mill-awtoritajiet Taljani għal xhur sħaħ. Investigazzjonijiet mis-Central Intelligence and Analysis Unit tal-pulizija identifikaw lir-raġel li nstab jistaħba f’Malta. Kmieni dalgħodu, l-pulizija arrestatu f'San Pawl il-Baħar fejn kien jgħix.

L-operazzjoni twettqet b’kollaborazzjoni mal-pulizija Taljana, li wkoll arrestat 31 persuna f’Siracusa, Sqallija. Iċ-ċirku tat-traffikar tad-droga kien qed jagħmel profitti ta' € 25,000 kuljum. Ir-raġel qed jinżamm fil-kwartieri ġenerali tal-pulizija fil-Furjana, u se jkun mixli fil-qorti nhar għada.