Raġel iweġġa' gravi wara ħabta f'Għawdex

Illum, għall-ħabta tas-6:30 a.m  il-Pulizija ġiet infurmata b’inċident tat-traffiku fi Triq Fortunato Mizzi, ir-Rabat, Għawdex.

Il-Pulizija marret minnufih fuq il-post u minn stħarriġ preliminari li sar irriżulta li mutur tat-tip Daelim, misjuq minn raġel ta' 63 sena u residenti x-Xagħra, kellu impatt ma' Mitsubishi li f'dak il-ħin kienet wieqfa fil-ġenb tat-triq.

Fuq il-post issejjaħ tim mediku sabiex jassisti, u ambulanza ħadet ix-xufier tal-mutur l-Isptar Ġenerali ta' Għawdex għall-kura meħtieġa. Aktar tard, huwa ġie ċċertifikat li weġġa’ gravi.

L-investigazzjonijiet tal-Pulizija għadhom għaddejjin.