Malta esperjenzat żieda żgħira fl-inflazzjoni f’Settembru, skont figuri ppubblikati mill-Uffiċċju Nazzjonali tal-istatistika nhar it-Tlieta.
L-inflazzjoni telgħet għal 4.1%, żieda ta’ 0.1 punti meta mqabbla mal-4% tax-xahar ta’ qabel.
Iż-żieda fl-inflazzjoni kienet primarjament imqanqla miż-żieda notevoli fil-prezzijiet tal-ikel. Skont ir-Retail Price Index (RPI), il-prezzijiet tal-ikel għolew bi 8.8%. Il-prezzijiet tal-ikel, (esklużi s-servizzi tar-ristoranti u ikel għal barra), għolew b’rata annwali ta’ 9.5%. Sadanittant, is-servizzi tar-ristoranti u ikel għal barra (take-away) esperjenzaw żieda annwali ta’ 6.7%.
It-tieni l-ogħla żieda annwali kienet osservata fl-ispejjeż tad-djar, li rreġistraw 8.1%,
B’kuntrast qawwi, l-inqas rati ta’ inflazzjoni annwali ġew innutati fis-settur tat-trasport u l-komunikazzjoni, bi tnaqqis ta’ -2.1%. Barra minn hekk, is-settur tal-ilma, l-elettriku, il-gass u l-fjuwils ma wera ebda moviment sforz is-sussidji li qed jagħti l-gvern biex iżomm il-prezzijiet stabbli.
Kontributuri għaż-żieda fl-inflazzjoni
L-NSO rrimarka li l-aktar impatt sinifikanti fuq l-inflazzjoni annwali ta’ Settembru nħass fl-Indiċi tal-Ikel, li kkontribwixxa +1.89 punti perċentwali għar-rata ġenerali. Dan kien attribwit primarjament għal żieda qawwija fil-prezzijiet tal-ikel take-away, li kellha impatt fuq il-konsumaturi. Sussegwentement, it-tieni u t-tielet l-akbar impatti dehru fl-Indiċi tad-Djar (+0.64 punti) u l-Indiċi ta’ Oġġetti u Servizzi Oħra (+0.48 punti), primarjament minħabba żieda fl-ispejjeż fis-servizzi tal-manutenzjoni tad-djar u l-assigurazzjoni, rispettivament.
Bil-maqlub, kien osservat impatt 'l isfel fuq l-inflazzjoni annwali fl-Indiċi tat-Trasport u l-Komunikazzjoni, li kkontribwixxa -0.45 punti. Dan kien attribwit prinċipalment għal prezzijiet aktar baxxi fis-servizzi tat-trasport bl-art, li pprovdew serħan żgħir għall-konsumaturi f'dawn is-setturi.
.jpg)
