Fejn qabel kienu jidħlu 150 telefonata kuljum għall-ambulanzi, waqt il-mewġa ta' sħana fl-2023 daħlu madwar 250 telefonata kuljum.
Is-Supretendent għas-Saħħa Pubblika Charmaine Gauci tkellmet dwar dan nhar is-Sibt filgħodu fuq il-programm Andrew Azzopardi on RTK103, u stqarret li kienet impressjonata.
Qalet li minħabba l-fatt li t-temperatura mistennija tilħaq kważi 35°C, kull dar tal-anzjani hi obbligata jkollha ġeneratur għall-emerġenza f’każ li jinqata’ d-dawl.
Gauci spjegat ukoll kif il-mewġa tas-sħana li ħakmet lil Malta s-sajf li għadda, ħadet il-ħajja ta’ 80 ruħ, bi wħud minnhom “setgħu jiġu evitati.”
“L-agħar ħaġa kienet li f’ġimgħa minnhom, 44% tal-imwiet kollha seħħew f’darhom stess u lanqas laħqu missew mas-servizzi tas-saħħa,” tenniet Gauci.
Hija tkellmet fuq kif twaqqaf grupp sabiex jidentifika n-nuqqasijiet fil-pajjiż, fosthom fid-djar residenzjali, sabiex ikunu preparati aħjar għas-sajf.
Wissiet biex anzjani, tfal u annimali ma jitħallewx fil-karozza sakemm isir il-qadi. Appellat ukoll biex min għandu ġirien li jgħixu waħedhom, jagħmlu kuntatt magħhom għax b’hekk jissalvaw il-ħajjiet.
‘Kunu responsabbli jekk għandkom il-Covid’
Waqt li tindirizza ż-żieda fil-każijiet tal-Covid, Charmaine Gauci talbet lill-pubbliku biex ikun responsabbli u jagħmel kwarantina jekk ikollu l-virus.
Il-Ħadd li għadda, il-gazzetta MaltaToday irrapurtat li apparti li l-isptar qed ibati biex jakkomoda l-pazjenti minħabba nuqqas ta’ sodod, qed tiġi nnutata żieda ta’ każi ta’ Covid.
Mill-bidu ta’ dan ix-xahar, ġie rraportat li l-ammont ta’ każi attivi tela’ għal 409 filwaqt li mietu erba’ persuni.
Spjegat li minħabba li eventwalment tlaqqmu bosta persuni, il-Covid m’għadhux perikoluż daqs kemm kien fil-bidu tiegħu, meta l-ebda persuna ma kellha immunità għalih.
Għaldaqstant żiedet tgħid li issa hemm il-varjant tal-Omicron fost varjanti oħra, u għalhekk huwa essenzjali li xorta waħda kulħadd ikun responsabbli jekk ikollu l-Covid.
Żiedet tgħid li huwa tajjeb li wieħed jagħmel test id-dar jekk iħoss xi sintomi u jkun imħasseb li għandu l-Covid.
Mistoqsija dwar it-tħassib ta’ bosta dwar l-effetti tat-tilqima, Gauci qalet li kwalunkwe` mediċina jista’ jkollha l-effetti tagħha. Qalet li huwa naturali li jkun hemm effetti sekondarji la darba l-maġġoranza tal-poplu ħa t-tilqima.
Spjegat li għad hemm nies li għadhom ibatu b’Long Covid, jew inkella għadhom taħt wieħed mill-effetti tal-Covid sal-ġurnata tal-lum.
Rigward l-influss ta’ turisti, u t-tħassib li jġibu magħhom aktar mard, Gauci kkalkulat li fil-ġimgħa qed ikun hemm madwar 800 applikazzjoni ta’ persuni li jridu jiġu screened.
Tkellmet fuq il-ħtieġa li d-dinja titgħallem mill-esperjenza tal-pandemija sabiex ma tirrepetix l-iżbalji li wettqet fil-passat.
.jpeg)
