Excel Investments Ltd, kumpanija parzjalment proprjetà ta’ Joseph Portelli u s-sieħeb fin-negozju tiegħu Mark Agius, applikat biex tirregolarizza żewġ pools massivi illegali fil-Qala biswit blokk ta’ appartamenti tul Triq ta’ Kassja u Triq il-Wardija.
Iż-żewġ pixxini massivi wieħed ta’ 414 metru kwadru u ieħor ta’ 267 metru kwadru bħalissa huma soġġetti għal infurzar ta’ ppjanar maħruġ mill-Awtorità tal-Ippjanar wara li l-qrati kienu qalbu permess preċedenti għall-bini tal-pools f’Marzu. L-applikazzjoni mressqa mill-perit Alex Bigeni tipprevedi wkoll is-sanzjonar ta’ għadira żgħira għal-ħut u tisbiħ estensiv madwar il-pixxini.
Il-pixxini jiffurmaw parti minn blokk ta’ 164 appartament fit-tarf taż-żona ta’ żvilupp approvat permezz ta’ tliet applikazzjonijiet differenti ppreżentati fl-2019.
Il-pools enormi li jinsabu fuq art ODZ kienu ġew approvati permezz ta’ applikazzjoni oħra ppreżentata fl-2021 u approvati matul il-kampanja elettorali tal-2022. Din l-applikazzjoni kienet tipprevedi s-sanzjonar tal-iskavi lil hinn mil-livelli approvati qabel.
Il-permess ingħata kontra r-rakkomandazzjoni tal-case officer, u aktar tard id-deċiżjoni ġiet ikkonfermata wkoll mit-Tribunal ta’ Reviżjoni tal-Ambjent u l-Ippjanar.
Iżda f’Marzu il-permess kien annullat mill-Qorti wara appell b’suċċess mill-Moviment Graffitti u l-kunsill lokali tal-Qala. Fid-deċiżjoni tiegħu l-Prim Imħallef Mark Chetcuti ikkonkluda li l-pixxini ġew approvati bi ksur tal-policies eżistenti.
Filwaqt li l-permess ingħata bis-saħħa ta’ policy ġenerika li tippermetti pixxini fiż-żoni ODZ, il-qrati kkonkludew li l-approvazzjoni tagħhom kienet qed tikser policies speċifiċi applikabbli għas-sit.
Billi japplikaw biex jissanzjonaw il-pools illegali, l-iżviluppaturi jistgħu jittardja azzjoni ta' infurzar li normalment trid tistenna r-riżultat tal-applikazzjoni.
