Is-sidien ta’ Villa Rosa esprimew l-appoġġ tagħhom favur konsultazzjoni pubblika dwar tibdil fil-pjan lokali taż-żona.
“Naraw dan il-proċess bħala pass importanti biex nibilanċjaw il-pjanijiet tagħna għall-iżvilupp mal-ħtiġijiet tal-komunità u l-għanijiet tal-Gvern biex jippromwovi t-turiżmu ta’ kwalità, iżid l-ispazji miftuħa, u jipproteġi l-ambjent,” qalu fi stqarrija nhar il-Ħamis.
Il-ġimgħa li għaddiet, is-sit ta’ Villa Rosa spiċċat f’kontroversja wara li ħareġ li l-Kabinett ivvota fuq proposta biex jinbidel il-pjan lokali. L-ILLUM irrappurtat il-Ħadd li l-vot ħalla numru ta’ ministri skomdi, peress li nnutaw li l-mossa li tkun ta’ vantaġġ għall-iżviluppatur, Anton Camilleri, tmur kontra l-kummenti tal-Prim Ministru Robert Abela, meta qal li l-pjanijiet lokali ma jistgħux jinbidlu b’mod arbitrarju.
Fi stqarrija nhar il-Ħamis filgħodu, is-sidien ta’ Villa Rosa qalu li jaraw it-tibdil fil-pjan lokali bħala opportunità biex jippreżentaw proposta ġdida lill-Awtorità tal-Ippjanar u jwasslu proġett aħjar.
“Proġett li mhux biss joffri prodott turistiku superjuri iżda wkoll benefiċċji sinifikanti għall-komunità lokali. F’dan ir-rigward, lesti nirrevedu l-proġett,” qalu.
Is-sidien qalu wkoll li jimpenjaw ruħhom biex inaqqsu l-għoli mit-talba preżenti u jistabbilixxu l-għoli tal-bini biex jiżguraw li ma jkunx hemm applikazzjonijiet għal sulari addizzjonali fil-futur.
Ir-reviżjonijiet jinkludu wkoll iż-żamma tal-art skont dak li huwa permissibbli għall-inħawi ta' Villa Rosa taħt il-politiki kurrenti.
“[Se] noħolqu spazju miftuħ pubbliku ġdid, li bħalissa ma jeżistix u ma kienx inkluż fil-permess attwali, peress li l-ispazji miftuħa kollha kienu privati,” qalu s-sidien.
Huma wegħdu wkoll li jirtiraw kull żvilupp fil-permess approvat preżenti biex jipproteġu żoni sensittivi ambjentalment u jimpenjaw ruħhom biex jirriabilitaw u jipproteġu dawn iż-żoni.
“F’konsultazzjoni ma’ entitajiet ambjentali, se nħawlu siġar indiġeni fi ħdan il-proġett,” qalu.
Biex jevitaw traffiku f’San Ġorġ, is-sidien qed jimpenjaw ruħhom li jintroduċu triq interna u jinvestu fl-infrastruttura meħtieġa biex jevitaw pressjoni fuq is-sistemi eżistenti.
“Aħna lesti nkunu parti minn viżjoni li tgħaqqad l-iżvilupp sostenibbli mal-aspirazzjonijiet usa’ għaż-żona,” temmet l-istqarrija.
Il-Proposta kurrenti
Il-proposta kurrenti tara żewġ torrijiet ta’ 27 u 34 sular fuq San Ġorġ li se jospitaw 789 appartament bis-servizzi, 247 kamra ta' lukanda, u 16,000m² ta’ spazju għal uffiċċji, fi proġett tal-iżviluppatur Anton Camilleri, ibnu Adelbert u Garnet Investments.
Anton Camilleri jiġġustifika ż-żieda tal-ispazju totali, li żdiedet minn 141,000m² għal 237,000m², billi jirreferi għal ‘pjazza’ ta’ 11,000m² għat-tul tal-bajja, li tikkorrispondi fid-daqs ma' Pjazza Tritoni. L-inħawi madwar il-Villa Rosa, se jkunu rrestawrati u se jinżammu bħala ġnien privat ta' 5,600m² mżejjen b'siġar u arbuxelli indiġeni.
