Il-Kap tal-Oppożizzjoni Bernard Grech ċaħad l-allegazzjonijiet li sarulu mill-Ministru għall-Ippjanar, Clint Camilleri, dwar approvazzjoni li allegatament kien ta lill-iżviluppatur tal-proġett ta’ Villa Rosa għal bidliet fil-Pjan Lokali.
“Min qed jallega li tajt l-approvazzjoni tiegħi għal xi tibdil parzjali fil-Pjan Lokali qed jigdeb. Jien ċert li qatt, f’ebda mument jew ċirkostanza, ma indikajt jew għidt li jien favur tibdil parzjali fil-Pjan Lokali li jippermetti proġett li mhux ta’ benefiċċju għall-ambjent u li ma jirrispettax il-kwalità tal-ħajja tar-residenti,” qal Grech f’dikjarazzjoni nhar il-Ħamis filgħodu.
L-Erbgħa filgħaxija, waqt ix-xhieda tiegħu fil-kumitat parlamentari għall-ambjent u l-iżvilupp, il-Ministru għall-Ippjanar Clint Camilleri qal li l-iżviluppatur ta’ Villa Rosa rċieva xi tip ta’ approvazzjoni mingħand il-Kap tal-Oppożizzjoni waqt laqgħa fejn ġew spjegati t-tibdiliet proposti fil-pjan lokali.
“L-iżviluppatur talab laqgħa u qalli li kien għadu ġej minn laqgħa mal-Kap tal-Oppożizzjoni, li qallu biex imexxi l-proposta ‘għax tkun sabiħa ħafna’ u li jjinawguraha hu stess meta jsir Prim Ministru,” qal Camilleri lill-kumitat parlamentari għall-ambjent u l-iżvilupp.
Madankollu, Grech ċaħad dawn l-allegazzjonijiet, u saħaq li l-Partit Nazzjonalista diġà ddikjara l-oppożizzjoni tiegħu għal kwalunkwe tibdil fil-Pjan Lokali li ma jkunx favur ir-residenti u l-ambjent.
“Jien favur li niżguraw, bħala nazzjon, li kwalunkwe żvilupp isir skont il-liġijiet ta' pajjiżna, b'protezzjoni sħiħa tal-ambjent, u li jtejjeb il-kwalità tal-ħajja tan-nies,” qal il-Kap tal-Partit Nazzjonalista.
Huwa saħaq ukoll li dejjem insista li l-pajjiż għandu jibbenefika minn investiment privat li jkun responsabbli, etiku, u sostenibbli. "Il-futur ta' pajjiżna jiddependi minn dan it-tip ta' żvilupp," żied jgħid.
L-Oppożizzjoni nhar l-Erbgħa ressqet mozzjoni fil-parlament biex titlob li l-Kamra tal-President tordna laqgħa tal-kumitat għall-ambjent tagħha, fejn il-Ministru għall-Ippjanar Clint Camilleri jkun mitlub jagħti spjegazzjonijiet dwar it-tibdiliet fil-pjan lokali ta’ Villa Rosa. Il-gvern emenda l-mozzjoni u t-talba ġiet milqugħa.
.jpeg)
