Skont statistika maħruġa mill-Uffiċċju Nazzjonali tal-Istatistika (NSO), jidher li fir-raba’ kwart tal-2023 in-numru ta' impjiegi kien ilaħħaq 305,218 jew 64.4% tal-popolazzjoni fl-età taʼ 15-il sena u aktar (15+).
Mill-banda l-oħra, l-ammont taʼ persuni qiegħda kien jammonta għal 8,928 (1.9%), filwaqt li n-numru taʼ persuni mhux attivi fis-suq tax-xogħol kien taʼ 159,620 (33.7%).
Ir-rata tal-attività fis-suq tax-xogħol fl-aħħar kwart tal-2023 kienet taʼ 81.4%, bl-ogħla rata tkun fost il-persuni fl-età taʼ bejn il-25 u l-54 sena (90.9%).
Bħala medja, 79 persuna minn kull 100 fl-età bejn il-15 u l-64 sena kienu qegħdin jaħdmu.
Għall-irġiel, ir-rata tax-xogħol kienet taʼ 85.5%, filwaqt li għan-nisa din kienet taʼ 71.4%.
L-akbar sehem taʼ persuni jaħdmu kien qalb in-nies fl-età bejn il-25 u l-34 sena, kemm għall-irġiel kif ukoll għan-nisa.
Dawk li jaħdmu għal rashom kienu jammontaw għal 14.4% tan-nies kollha bʼimpjieg ewlieni.
Dawk li jaħdmu full time għal rashom kienu jgħoddu 268,640, filwaqt li 36,578 oħra kellhom impjieg part-time bħala l-impjieg ewlieni tagħhom.
L-istatistika turi li bħala medja, il-persuni full-time ħadmu 41.1 siegħa, filwaqt li dawk part-time ħadmu 22.2 siegħa fil-ġimgħa.
Fir-raba’ kwart tal-2023, is-salarju bażiku medju fix-xahar tal-impjegati kien stmat taʼ €1,837. L-ogħla salarju bażiku kien irreġistrat fil-qasam tal-Attivitajiet finanzjarji u tal-assigurazzjoni (Tabella nru 9). Is-salarji medji fix-xahar varjaw minn €1,120 fost persuni impjegati fʼxogħlijiet elementari għall-€2,959 fost il-maniġers.
Rata ta’ qagħad
L-akbar għadd taʼ persuni qiegħda kien fost dawk ta’ bejn bejn il-25 u l-74 sena.
In-nisa kienu jifformaw 59.1% tan-nies kollha li ma kinux attivi fis-suq tax-xogħol u dawk ʼl fuq minn 65 sena kienu jirrapreżentaw l-akbar għadd taʼ nies mhux attivi minħabba li tkun intlaħqet l-età tal-irtirar jew minħabba li l-persuni jkunu rtiraw qabel iż-żmien (43.3%).
