Bruges: Il-belt medjevali tal-ħrejjef

Jekk trid tgħix fi ħrafa ħajja, il-belt pittoreska u medjevali ta’ Bruges (Brugge bil-flemish), hi l-belt ideali. Vjaġġ ta’ siegħa u kwart bit-tren mill-Gare du Midi ta’ Brussell, iwasslek  f’dinja tal-ħrejjef, jew aħjar kif ngħidu bil-Malti, belt bi djar tal-pupi. Belt bi knejjes storiċi, pjazez medjevali, imdawra b’kanali u trejqiet mimlija ‘cobbles’ u mdawra b’fetħiet imħaddra u bis-siġar li jagħtu nifs lil dinja maħnuqa. Belt stupenda, belt li tibqa fil-memorja tiegħek għal dejjem. Iżda għandha difett wieħed: jafu wisq nies biha u għalhekk dejjem imdewda bit-turisti, u fis-sajf ħafna aktar mix-xitwa. Normalment wieħed iżur Bruges għal ġurnata waħda fejn, ħa ngħiduha kif inhi, jirnexxielek iżżurha kollha. Iżda biex vera tgawdiha b’mod rilassanti u żżur anke xi mużew milli hemm u tagħmel xi passiġġati ħelwin, jekk tqatta’ lejl hemmhekk b’ikla tajba f’wieħed mill-ħafna ristoranti li ssib fiċ-ċentru, żgur li tkun imprezzabli, speċjalment il-mod kif tkun imdawla filgħaxijiet titfgħek bħal speċi f’dinja tal-ħrejjef.

Bruges hi belt li tisraqlek qalbek. Belt mimlija storja li għamlitha dik li hi, jiġifieri l-belt bit-titlu mogħti lilha mill-UNESCO bħala wirt dinji. Għax din il-belt irnexxielha żżomm il-misteri tal-Medju Evu u fl-istess ħin hi metropoli internazzjonali li fiha ssib li trid. Issib kull ħanut tad-dittà tal-ħwejjeġ, fwejjaħ, make-up, u naturalment ċikkulata galore.

Iċ-ċentru li jdur kollox miegħu hu l-pjazza tas-suq, li hi pjazza enormi mdawra b’arkitettura Medjevali u bil-karrozzini għaddejjin mimlija turisti bil-kamera f’idejhom bil-ħoss taż-żwiemel ifaqqgħu saqajhom fuq il-ġebel imqabbeż. Pjazza li tista’ titgawda waqt xi pranzu ‘open air’ fil-bosta ristoranti li hemm imdawrin magħha, filwaqt li tara turisti ma jafux minn fejn se jibdew biex jieħdu ritratt tajjeb. Jien ħadt wieħed ‘panorama’ u rriproduċejtu hawn. Fiċ-ċentru ta’ din il-pjazza, ħafna mill-bini indurat mhux oriġinali. Iżda fin-numru 16 wieħed isib il-Craenenburg Café, fejn fl-1488 Massimiljanu tal-Awstrija, eredi tal-Hapsburgs ġie arrestat mill-mexxejja tal-belt wara li pprova jirrestrinġilhom il-privileġġi li kellhom.

Jekk iżżur Bruges, ma tistax ma tagħmilx dawra mal-kanal fuq dgħajsa li tieħdok tul il-kanali pittoreski tagħha. Dawra li tiswik madwar €8...titilfuhiex! Normalment, il-barklor ikun xi student u b’Ingliż ferm tajjeb, jgħaddilek informazzjoni dwar il-belt waqt id-dawra tiegħu b’ battuti ħelwin li jifqgħek bid-daħk u lejn it-tmiem tad-dawra, jitfagħlek botta għat-tips għax jgħid li t-tips jużahom jew biex jistudja, jew inkella biex jixrob xarba birra li biha jitħajjar jistudja!! €1 jew €2 iżjed mhux se tfaqqarkom. Li tara l-belt mill-kanali hi differenti ħafna milli kif taraha minn fuq l-art. It-tnejn sbieħ imma t-tnejn trid tagħmilhom.

Djar ta’ meditazzjoni għan-nisa li riedu dinja spiritwali barra l-kunvent

Il-Beguines kien moviment reliġjuż ta’ xebbiet jew romol li riedu jgħixu ħajja reliġjuża mingħajr ma jinqaflu f’monasteru jew kunvent. Għalhekk, f’ħafna mill-bliet Belġjani u Olandiżi kienu nħolqu dawn il-postijiet imsejhin ‘Begijnhofs’  fejn dawn in-nisa kienu jgħixu u jitolbu. Dik ta’ Bruges bla dubju hi waħda jekk mhux l-isbaħ waħda minnhom u tħabbatha ma’ dak ta’ Amsterdam. Mill-1930 dan il-‘beguinage’ ittieħed mis-sorijiet Benedittini li d-djar ikkonvertewhom f’kunvent. Kulħadd jista jidħol f’din il-wesa’ iżda jekk jogħġobkom, tagħmlux wisq storbju għax ittelfulhom il-paċi. Din il-‘begijnhof’ tmur lura għas-seklu 13, anzi għall-1245 biex inkun preċiż, u hi waħda mill-aktar priżervati fid-dinja. L-aħjar li wieħed iżurha hi fir-rebbiegħa meta l-wesa’ tkun imdewda bid-daffodils’.

Mela f’din is-speċi ta’ bitħa, wieħed jista’ jara speċi ta’ treehouses, djar tal-injam mas-siġar għoljin. Dawn huma skulturi mill-artist Ġappuniż Tadashi Kawamata li għamel tużżana djar tal-injam li jagħtu dehra ta’ xi ħadd li qed jittawwal minn fuq, lejn kull min ikun għaddej minn taħthom. Huma skulturi poetiċi li jesploraw il-konfini bejn l-arti, l-arkitettura u n-natura. Huma preżenza f’dan l-ambjent ta’ nisġa bejn l-ispirtu avventuruż ta’ tfajjel li dejjem joħlom li jinqata’ f’dar fuq siġra mal-ispiritwalità intrinsika, il-paċi u l-formalità tal-Beguinage. Meta wieħed ikun qed iżur dan il-post, hemm sinjali li jitolbuk iżżomm is-silenzju u t-tfal mhux permessi li jidħlu hemm u jagħmlu l-istorbju.

Wara dan kollu, jekk issibu ħin, morru passiġġata fil-foresti li jdawru lil din il-belt.

Hawn min isejjaħ din il-belt bħala Venezja tan-naħa ta’ fuq tal-Ewropa. Jien personalment ma naqbilx. Għax din il-belt mhix Venezja, anke jekk mimlija kanali, din il-belt hi unika bħalma Venezja hi unika.

Kif tasal hemm:

Bla dubju li l-mod kif tasal hemm hu bit-tren minn Brussel u jiswiek biss €19.