Editorjal | Mid-dawl għad-dlam

Ħadd ma jista’ jiċħad li qed ngħaddu minn perjodu ta’ sħana inkreddibli.  Sħana li għandha turina kemm huwa meħtieġ li nibdew naġġixxu minnufih fuq il-klima. Imma min-naħa l-oħra Malta mhux pajjiż li ma għandux esperjenza u storja intrinsika marbuta mal-estremitajiet tal-klima.  U matul is-snin, Malta għax kienet taf li l-popolazzjoni qed tikber u l-kwalita ta’ l-għixien qed jiżdied investiet fl-enerġija.

Smajna fuq li smajna bl-infiq ta’ mijiet ta’ miljuni biex ikollna biżżejjed enerġija għal aktar mumenti diffiċli. U sirna nafu li għandha biżżejjed enerġija għal sitwazzjoni fejn ikollna splużjoni fil-konsum. 

Qisu kullħadd nesa, li biex twassal l-elettriku jrid ikollok sistema li jkollu apoġġ tekniku kontinwu. Imma biex niżviluppaw, nibnu, nagħmlu toroq ġodda u nbiddlu pajjiżna f’ġungla ta’ konkrit insejna li s-sistema ta’ kif l-elettriku jasal fi djarna irid jiġi aġġornat min dak l-antik.

U bil-kalmezza kollha smajna li “...qed nagħmlu li nistgħu biex nirrangaw is-sistemi taħt l-art.”  U waqt li jagħmlu dak li jistgħu, kommunitajiet sħaħ jibqgħu bla dawl. 

Meta xi snin ilu taħt l-amministrazzjoni Abela, f’Wied il-Għajn inqata d-dawl fi żmien tal-Milied, il-ministru Joe Mizzi li kien responsabbli mill-Enemalta spiċċa fil-kotba hżiena ta’ Robert Abela u l-karriera politika tiegħu spiċċat ftit wara.

Ma nistgħux ngħidu l-istess għal Ministru Miriam Dalli, li ftit li xejn ġiet ikkritikata. U ftit li xejn smajna xi dikjarazzjoni jew apoloġija dwar il-falliment tad-distribuzzjoni tad-dawl.

Hija tal-mistħija li wara tant dikjarazzjonijiet solenni mill-Enemalta jkollok sitwazzjoni bħal din li huwa frott in-nuqqas ta’ ippjanar u preparazzjoni u viżjoni ta’ kif inżommu l-provvista tal-enerġija għaddej anke f’perjodi estremi.

Huma f’mumenti bħal dawn li nindunaw kemm verament s-sistema ta’ pajjiżna hija mmexxija minn nies li ma jifhmux jew inkella huma verament limitati fl-għarfien ta’ x’inhu importanti jew le.