[AĠĠORNAT - FILMAT u RITRATTI] Nar f'dar ta' anzjan f'Ħ'Attard
Nar minħabba short circuit għal ħabta tad-9.15am. Salvati tlett iklieb
Aġġornament
Richard Cassar ta’ 65 sena b’xorti tajba ma kienx id-dar meta għall-ħabta tad-9.15am żviluppaw nirien fir-residenza tiegħu li tinsab fi Sqaq numru 2 fi Triq San Duminku, Ħ’Attard. Kienet il-ġara tiegħu li ndunat bin-nirien li mill-ewwel talbet għall-ajjut.
Mary Rose Sciberras qalet lil illum.com.mt dak il-ħin kienet qed tonxor u titwi l-ħwejjeġ. “Bdejt inxomm riħa ta’ xi ħaġa taqbad u ħsibt li kelli xi ħaġa fuq in-nar. F’daqqa waħda rajt duħħan fid-dar u kif ittawwalt barra ndunajt li d-duħħan kien ġej mid-dar ta’ Richie,” qaltilna Sciberras li kienet għadha maħkuma minn xokk.
Il-mara kompliet tgħid li ħarġet u bdiet tgħajjat lil Richard. “Ħabbat mal-bieb, ċempiltlu, imma ma rrispondiex.”
Min-naħa tiegħu Cassar, għalkemm deher maħsud b’dak li sab, kien kuntent li t-tlett iklieb ma ġralhom xejn.
“Mort nagħmel il-VRT u ċempilli Pulizija u qalli li kien hemm xi nar fid-dar tiegħi. Ġejt mill-ewwel u ħsibt li se nsib il-klieb mejtin. Dawn qishom uliedu,” qalilna Cassar.
L-ewwel ma waslu fuq il-post kienu PC David Mercieca u PC Roderick Vassallo mill-Iskwadra tar-Rapid Intervention Unit li sgassaw il-bieb u permezz ta’ fire extinguisher bdew jikkontrollaw in-nirien. Ftit minuti wara waslu wkoll il-membri mid-Dipartiment tal-Protezzjoni Ċivili li flimkien mal-Pulizija salvaw tlett iklieb tar-razza pug li Cassar kellu fid-dar. Kollox jindika li n-nirien bdew minn short circuit fil-mains tad-dawl tal-Enemalta. Għalkemm in-nirien ikkawżaw xi ħsarat, dawn ma leħqux inferxu mad-dar kollha u dan grazzi għal Mary Rose Sciberras li sejħet mill-ewwel għall-għajnuna u l-intervent f’waqtu mill-Pulizija tal-RIU u l-membri tal-Protezzjoni Ċivili.
Mary Rose Sciberras kellu xokk kbir fuqu tant li anke dehret emmozjonata b’dak li ġara l-aktar għax beżgħet li Cassar seta’ kien għadu ġewwa. Kien l-istes Cassar li fil-fatt beda jikkalma lil ġara tiegħu li kienet turija ta’ rispett li hemm bejniethom.
Il-Pulizija tad-Distrett ġew ukoll informati u qegħdin jinvestigaw il-każ.
iktar kmieni...
Nirien ġew irrapportati f'dar ta' anzjan fi Triq San Duminku f'Ħ'Attard.
Jidher li n-nirien ġew ikkawżati minn short circuit. Fil-ħin tal-inċident l-anzjan ma kienx id-dar, iżda kien hemm tlett iklieb, li ġew salvati mill-Pulizija u mill-membri tal-Protezzjoni Ċivili.
