Aġġornata | Il-Gvern ġdid Spanjol se jilqa' lill-immigranti; Salvini jiddikjara rebħa

Il-Gvern ġdid Spanjol se jkun qed jilqa' l-bastiment b'629 immigrant li kien ilu sigħat bejn sema u ilma 'l barra minn Malta wara li l-Gvern Taljan għalaq il-portijiet tiegħu. Immedjata kienet konferenza tal-aħbarijiet mill-Ministru għall-Intern Taljan, Matteo Salvini li ddikjara li l-Italja laħqet "l-ewwel oġġettiv tagħha."

Ħabbar dan fuq Twitter il-Prim Ministru Joseph Muscat li filwaqt li rringrazja lill-Prim Ministru Spanjol, qal li l-Gvern Malti se jkun qiegħed jibgħat lill-bastiment dak kollu li l-immigranti għandhom bżonn.

I thank #Spain PM @sanchezcastejon for taking in #Aquarius after #Italy broke international rules and caused a standoff. #Malta will be sending fresh supplies to the vessel. We will have to sit down and discuss how to prevent this from happening again.This is a European issue -JM

— Joseph Muscat (@JosephMuscat_JM) June 11, 2018

Muscat kiteb li "hemm bżonn inpoġġu bilqiegħda biex ikun żgurat li dan ma jerġax jiġri."

Fakkar ukoll li l-Italja, f'dan il-każ, kissret il-liġijiet internazzjonali.

Fi stqarrija, il-Gvern Spanjol qal li l-Prim Ministru l-ġdid, Pedro Sánchez, ta l-istruzzjonijiet kollha neċċessarji biex Spanja tonora l-obbligi internazzjonali u uminitarja tagħha. "Għandna dmir li nevitaw katastrofi umanitarja u noffsu 'port sigur' lil dawn il-persuni skont il-liġijiet internazzjonali," saħaq il-Gvern Spanjol.

'Malta għandha portijiet siguri'

'Malta qed tiġi taqa' u tqum' - Salvini

Intant, f'konferenza tal-aħbarijiet, Matteo Salvini qal li huwa inaċċettabbli li Malta qed tiġi taqa' u tqum u qed tibqa' tirreaġixxi daqslikieku ma ġara xejn. 

"Malta għandha portijiet siguri," kompla jinsisti waqt li saħaq li ma jistax ikun li l-Italja tibqa' responsabbli waħedha għat-tfittxija u s-salvataġġ fiċ-ċentru tal-Mediterran.

Minkejja dan, Salvini ċaħad li l-Italja, b'xi mod jew ieħor, qed tirrifjuta l-immigranti u spjega li l-Gvern Taljan talab biss pajjiżi oħra biex jagħtu l-għajnuna.

Mistoqsi jekk instabitx soluzzjoni permanenti, Salvini qal li l-għan tiegħu hu li jwaqqaf għal kollox it-traffikar uman, irrispettivament x'isem iġorr il-bastiment, waqt li indika li sitwazzjoni simili tista' terġa' tinħoloq fil-jiem li ġejjin.

Insista li fil-Libja għandu jkun hemm portijiet siguri u ċentri li jilqgħu lill-immigranti biex ikun evitat li persuni jaqsmu l-baħar.

Aqra wkoll:

• Titpoġġa taħt pressjoni r-relazzjoni bejn Malta u l-Italja
• Is-Soċjalisti Ewropew jfaħħru lis-sindki Taljani li lesti ma jobdux lil Salvini
• Il-UNHCR u l-UE jħeġġu lil Malta u l-Italja biex jgħinu lis-629 immigrant