Minkejja oppożizzjoni minn għaqdiet ċivili kontra l-kummerċjalizzazzjoni ta’ Kemmuna, partikolarment tal-Bajja Bejn il-Kmiemen, li l-isem popolari tagħha llum il-ġurnata sar Blue Lagoon, in-numru ta’ gabbani li joperaw f’dik iż-żona baqa’ jikber bil-mod tul is-snin.
Dal-fatt joħroġ minn mistoqsija parlamentari magħmula mill-Kelliem tal-Oppożizzjoni għal Għawdex Chris Said lid-Deputat Prim Ministru u Ministru għall-Affarijiet Barranin u t-Turiżmu Ian Borg.
Fil-mistoqsija, Said talab lill-Ministru “jgħid kemm kien hemm gabbani ġewwa Kemmuna f’dawn l-aħħar 15-il sena” iżda Borg stqarr li mhuwiex possibbli jwieġeb il-mistoqsija fl-intier tagħha.
Dan għaliex, fi kliem Borg, “l-Awtorità Maltija għat-Turiżmu (MTA) bdiet l-involviment tagħha fil-kontroll tal-gabbani ġewwa Kemmuna, speċifikament fiż-żoni ta’ Blue Lagoon u ta’ Santa Marija fl-2015. Fil-fatt informazzjoni fuq gabbani qabel din is-sena, mhijiex disponibbli.”
Fit-tweġiba tiegħu, id-Deputat Prim Ministru ta informazzjoni mill-2015 sal-2024. Minn dil-informazzjoni jidher illi n-numru ta’ gabbani li joperaw f’Bejn il-Kmiemen baqa’ jikber sena b’sena.
Fil-fatt, meta l-MTA bdiet tieħu ħsieb il-permessi tal-gabbani kien hemm sitt gabbani diġà. Dawn mill-ewwel żdiedu b’wieħed fis-sena ta’ wara, jiġifieri fl-2016, fejn b’kollox kien hemm seba’.
In-numru ta’ gabbani baqa’ l-istess sakemm reġgħu żdiedu b’wieħed fl-2019 biex b’kollox ikun hemm tmien gabbani.
Dan-numru baqa’ l-istess sal-2024 fejn reġa’ żdied b’wieħed biex ikun hemm total ta’ disa’ gabbani.
Santa Marija tispiċċa mingħajr gabbani
Iżda mill-informazzjoni joħroġ ukoll li l-Bajja ta’ Santa Marija spiċċat mingħajr gabbani.
Meta bdiet toħroġ il-permessi l-MTA, jidher illi ma kien hemm l-ebda gabbana topera f’Santa Marija. Imma sena wara ħareġ il-permess għal gabbana waħda.
Jidher illi l-bajja baqgħet b’gabbana waħda sal-2023, fejn, skont it-tweġiba tal-Ministru, ma baqa’ l-ebda gabbana topera.
