Anzjana ta' 80 sena hija t-62 vittma tal-Covid-19

Il-Ministeru għas-Saħħa ħabbar li anzjana ta’ 80 sena mietet waqt li kienet pożittiva bil-Covid-19.

L-anzjana ddaħħlet l-Isptar Mater Dei fid-9 ta’ Ottubru u ġiet ikkonfermata pożittiva għall-Covid-19 fit-13 ta’ Ottubru.

Hija baqgħet tingħata kura fl-Isptar Mater Dei fejn mietet tard ilbieraħ filgħaxija.

L-anzjana hija t-62 vittma tal-virus f'Malta.

Il-Ministeru għas-Saħħa, filwaqt li jagħti l-kondoljanzi lill-familjari, mill-ġdid jappella biex il-poplu jibqa’ jsegwi l-miżuri ta’ prevenzjoni biex flimkien nagħmlu d-differenza kontra l-imxija tal-Covid-19.