Bdiewa u attivisti ingħaqdu f’protesta quddiem l-uffiċini tal-Awtorita’ tal-Artijiet fejn akkużaw lill-Gvern li qed jara sal-ponta ta’ mnieħru u fl-istess waqt jhedded il-provista tal-ikel lokali, billi jħalli blokkok t’ apartamenti jieħdu post din l-art agrikola tal-gvern.
Fil-protesta tkellem Robert Bondin Carter li jaħdem f’dawn l-għellieqi, u tkellem fuq kemm kien irrabjat meta sab in-notifika tal-applikazzjoni minn żviluppatur. Qal li xi ħaġa bħal din hija kontraditorja ta’ dak li qed tħeġġeġ l-Ewropa li nkunu kawti fil-provista tal-ikel, fid-dawl tas-sitwazzjoni internazzjonali attwali.
Bondin Carter appella lill-Ministru Stefan Zrinzo Azzopardi, li jikkontesta għall-elezzjoni fuq id-distrett taż-Żurrieq, sabiex iwaqqaf din l-applikazzjoni, u appella lill-Gvern li skonthu “Gvern soċjalista tal-ħaddiema,” sabiex jipproteġġi l-għejxien tal-bdiewa.
L-applikazzjoni tal-iżvilupp ġiet sottomessa min Francis Spiteri, is-sid ta’ Tal-Karmnu Construction Company.
Tkellmet ukoll bidwija oħra, Annalisa Schembri, li qalet “din hija sitwazzjoni ta’ sens komun, ta’ x’inhu ġust u x’inhu ovvju.”
Hi sostniet l-importanza li l-bdiewa ż-żgħażagħ ma jitilfux l-introjtu tagħhom għax żviluppatur irrid jagħmel profitt.
Malcolm Borg, mill-Għaqda Bdiewa Attivi, tkellem fuq l-istorja tal-Awtorita tal-Artijiet li tieħu deċiżjonijiet kontra l-bdiewa. Hu qal kif din qatt ma bdiet diskussjonijiet kif tista tittejjeb is-sitwazzjoni tal-biedja f’Malta.
Borg enfassiza l-punt ta’ Bondin Carter, li Malta kienet qrib ħafna ta’ kriżi tal-ikel waqt l-pandemija u kif ukoll l-invażjoni tar-Russja fl-Ukranja li affetwat il-provista tal-qamħ.
“X’qed nistennew, li ninħarqu?” saħaq Borg l-importanza li l-biedja qat ma tiġi kkunsidrata bħala sempliċiment art li tista tiġi żviluppata. Kif ukoll, li riedu nqiesu l-kultivazzjoni bħala xi ħaġa ta’ ġid soċjali għal-komunita’.
Intant il-gvern kien qal li hu kien iddeċieda li kull żvilupp għandu ssir fi ftehim mal-kunsill lokali u bil-ħsieb ewlieni li tibbenifika l-komunita’.
