Issa uffiċjali! Oliver Scicluna se jieħu post Gavin Gulia

Oliver Scicluna se jkun qed jirrapreżenta lill-Partit Laburista fil-Parlament bħala Membru Parlamentari, u dan tħabbar b'mod uffiċjali mill-Partit Laburista. 

Kien il-Prim Ministru nnifsu li ressaq isem Oliver Scicluna quddiem il-Grupp Parlamentari tal-Partit Laburista, fejn ġiet diskussa l-co-option ta’ Membru Parlamentari fuq in-naħa tal-Gvern, tgħid l-istqarrija.

Ftit ħin ilu, il-Prim Ministru laqqa’ wkoll lill-Eżekuttiv tal-Partit Laburista biex tiġi diskussa l-co-option ta’ fuq livell tal-Eżekuttiv Nazzjonali tal-Partit Laburista, wara li Scicluna ġie approvat unanimament f’mekkaniżmu għall-co-option biex jimtela s-siġġu vakanti fil-Parlament.

Preżentament, Oliver Scicluna huwa l-Kummissarju tal-Kummissjoni għad-Drittijiet tal-Persuni b’Diżabilità, liema kariga ilu jokkupa sa minn Ġunju tal-2016. Huwa kien ukoll Chairman tal-Kummissjoni Nazzjonali għall-Persuni b’Diżabilità fl-2014, u serva bħala Chairman tal-Kumitat Azzjoni Soċjetà Ġusta li huwa kruċjali għat-tħejjija tal-Politika Nazzjonali dwar id-Diżabilità.

 Scicluna ggradwa b’degree fil-kors taż-Żgħażagħ u l-Istudji fil-Komunità mill-Università ta’ Malta, kif ukoll b’Masters fil-Business Administration.