Editorjal | L-isfidi ta’ Robert Abela

Matul dawn l-aħħar ġimgħat, din il-gazzetta, flimkien ma’ ħafna osservaturi politiċi oħra, kienet qed tistenna biex tara x’passi konkreti kienu ser jittieħdu minn Robert Abela bħala Prim Ministru. Dan wara r-riżultat xejn pożittiv għall-Partit Laburista fl-elezzjonijiet tal-Parlament Ewropew. 

Abela mhuwiex it-tip ta’ bniedem li jieħu d-deċiżjonijiet f’ħakka t’għajn; meta kien hemm il-kriżi tal-pandemija, għaddew ġimgħat sħaħ sakemm il-gvern irrealizza kemm kienet serja l-problema.   

Din id-darba l-affarijiet jidhru ftit differenti.  Jidher li hemm għarfien dwar il-problema serja.  Il-kwistjoni hija wkoll li ħafna mid-deċiżjonijiet mhux qegħdin f’idejn Abela. 

L-ewwel problema hija tal-eks Prim Ministru Joseph Muscat.  Muscat mhux biss sarima għal Abela u l-Partit Laburista, iżda bomba lesta biex tisplodi minn ħin għall-ieħor.  Il-bogħod mill-fatt li trid tiġi ddeterminata fil-proċessi ġudizzjarji jekk Muscat huwiex ħati tal-akkużi kriminali kontrih, il-fatti waħedhom jikkundannawh bħala politiku li fassal deċiżjonijiet djaboliċi u żbaljati li wasslu għat-tberbiq mill-flus tal-istat għall-gwadann ta’ ftit nies.  

Abela, kieku jista’, jarmi lil Muscat iżda ma jistax. U dan Muscat jafu. Għalhekk Abela jrid isib mod kif jista’ jkompli xogħlu mingħajr l-għajnuna tal-legat ta’ Muscat.  

Imbagħad hemm il-każ ta’ Chris Fearne, li daħal fl-istorja għax hu wkoll qed jaffaċċja akkużi kriminali fl-istess każ ta’ Stewards. 

Minħabba dan, in-nomina ta’ Fearne għall-Kummissarju fl-Ewropa ma seħħitx. Abela stess stqarr li hu qed jistenna l-eżitu tad-deċiżjoni tal-Qorti.   

Fearne qed jispera li jinħeles mill-akkuża – deċiżjoni li fil-liġi tiġi rreferuta bħala prima facie.  Hawn min qed isostni li din id-deċiżjoni mhix waħda ċerta u jekk il-każ ikun li Fearne jibqa’ akkużat kriminalment, Abela jkollu jagħżel persuna oħra għal Kummissarju u kif ukoll jaffronta l-problema ta’ Fearne, kriminalment akkużat, li jkun għadu jservi ta’ Deputat Kap. 

Il-problemi ma jonqsux. 

It-tielet problema hija l-opinjoni pubblika.  La darba tieħu daqqa ‘l isfel fil-politika, diffiċli terġa’ titla’; il-poplu jibda jqis kull ilma misħun. Għal kull problema fil-pajjiż fuq livell makro jew mikro, in-nies ser iwaħħlu fil-gvern tal-ġurnata. 

Ċertament, biex tindirizza din il-problema, irid ikun hemm rispons li jidher li qed iħalli frott.  

Huwa fiċ-ċar li n-nies issa ddejqu jisimgħu kliem u fatti xejn.