Editorjal | 60 sena ta’ Indipendenza

Sittin sena fihom. U f’dawn is-sittin sena ma nistgħux immaqdru biss. Illum Malta hija pajjiż sovran, Repubblika b’ġens ambizzjuż, intelliġenti, kolt, moħħu fil-flus, Ewropew u demokratiku. Niftaħru bi kwalità ta’ ħajja tajba, propjetarji ta’ djarna, ngħixu solidali ma’ xulxin b’xibka ta’ għajnuniet soċjali, ta’ saħħa u edukazzjoni. Hawn firxa wiesgħa ta’ nies b’ġid viżibbli: karozzi lussużi, dgħajjes, djar f’Għawdex u fi Sqallija, negozji u investimenti. Ekonomija vibranti fl-oqsma kollha. Turiżmu varjat u investiment fi proġetti ġodda. Politika ħajja u midja niggieża. Għandna minn kollox. U rajna minn kollox. Matul dawn is-sittin sena kien hemm żminijiet koroh, fejn ħsibna li kien hawn żewġ pajjiżi u żewġ ġnus; fejn għexna u nibqgħu ngħixu l-korruzzjoni. 

Fuq medda ta’ sittin sena, rajna d-dominanza ta’ żewġ partiti politiċi, l-irrilevanza tal-Knisja fis-soċjetà tagħna, ir-rivoluzzjoni soċjali tas-soċjetà Maltija, l-investimenti fis-saħħa, is-suq ħieles li sploda bejn il-limiti, il-konnettività li żdiedet b’mod konsiderevoli, l-influwenza tal-Ewropa, l-etika fil-politika u l-multikulturaliżmu f’pajjiżna. 

Imma apparti hekk rajna numru ta’ okkażjonijiet b’assenza totali ta’ viżjoni għal pajjiżna b’politiċi ta’ kull lewn jaraw biss sa mneħirhom. Fis-sens li ħafna drabi kien hemm deċiżjonijiet xprunati biss minn konsiderazzjonijiet elettorali. Nazzardaw ngħidu li dejjem u kull darba li ttieħdet deċiżjoni, ir-raġunijiet prinċipali kienu elettorali – BISS. 

Huwa għalhekk li llum f’pajjiżna, għandna sitwazzjoni li persuni jilħqu l-iktar għax huma ta’ ġewwa u fdati mill-partit fil-Gvern. Il-kultura ta’ nepotiżmu mhux biss hija aċċettata imma mistennija mingħand dawk li jeleġġu l-partit tagħhom fil-gvern. 

Hemm imbagħad il-politika dwar l-ippjanar, politika maħsuba biex taqdi lil min jiżviluppa u jiffinanzja l-partiti politiċi. U huwa għalhekk li Malta u Għawdex ġibnieha maqjel, b’monumenti ta’ konkrit, u kruha ta’ post. 

Hemm imbagħad il-politika li l-Gvern jappoġġja oqsma differenti mingħajr ma jara min jiflaħ u ma jiflaħx. Is-sussidju tal-fuel, tal-istipendji, tal-iskejjel privati, tal-lukandi, ta’ ċerti negozji u attivitajiet kummerċjali. 

Hemm ħafna affarijiet, fosthom li għandna gvern kbir wisq. Kulħadd impjegat mal-Gvern u kulħadd dipendenti fuq il-Gvern. 

Hemm il-kwistjoni serja ta’ kif nittrattaw il-migranti f’pajjiżna jew in-nies tat-tielet dinja. 

U fl-aħħar, irridu nistaqsu jekk sittin sena oħra Malta rriduhiex pajjiż li tista’ tgħix ġo fih jew mekka ta’ negozji differenti jorbitaw fi gżira ċkejkna, imbullata bin-nies u kerha b’torrijiet tal-konkrit u fgata bil-karozzi.  

Irridu nistaqsu jekk irridux inkomplu ngħixu f’pajjiż mingħajr boxxla. Fejn l-uniku pjanijiet huma dawk imfasslin biex il-politiċi li jmexxuna mingħalihom iżommu n-nies kuntenti u leali lejn il-partit tagħhom. Biex huma jkunu jistgħu jkomplu jgħixu l-ħajja komda tagħhom.