Editorjal | Il-popolazzjoni, il-biża’ ta’ poplu ipokrita
'Il-problema mhumiex il-barranin li jiġu hawn u jagħmlu xogħol li aħna ma aħniex lesti nagħmlu jew inkella m’hemm ħadd lest biex jagħmlu. Il-problema huwa l-mudell ekonomiku u l-viżjoni tal-politiċi tagħna...'
Karikatura ta' Mikiel Galea
Sondaġġ ieħor tal-gazzetta oħt MaltaToday juri bl-iktar mod ċar li l-preokkupazzjoni ewlenija tal-Maltin hija l-popolazzjoni jew il-ħaddiema barranin. Hija preokkupazzjoni mwielda minn realtà vera, imma li għaliha m’hemmx ħafna alternattivi.
U safrattant id-dipendenza ta’ kulħadd fuq il-barranin tant hija wiesgħa u kbira f’pajjiżna li diffiċli tifhem minn fejn hu ġej dan l-inkwiet.
Ġej bla dubju ta’ xejn minħabba l-iffullar u s-sentiment ta’ nies kullimkien, kif ukoll ta’ attività kontinwa bħal pereżempju traffiku kullimkien. Imma bla dubju ta’ xejn huwa wkoll frott il-mod kif qed ngħixu u rridu ngħixu. Irridu li jkollna ekonomija li tħabbat u ddawwar lira, irridu li jkollna l-kumditajiet kollha u rridu li ma jkollniex il-bżonn li nagħmlu xogħol antipatiku u tal-id. Imma hemm realtà oħra ... tant kibret l-ekonomija li litteralment m’hemmx Maltin jew Għawdxin biżżejjed biex ninqdew.
Minn accountants, sa waiters, sa sewwieqa tat-taxi, sa securities, u ħaddiema fuq il-post tal-kostruzzjoni.
U l-Malti li jħaddem jaf li bil-barranin se jiffranka u jagħmel aktar flus. U l-ħafna Maltin u Għawdxin li għandhom propjetajiet għall-kiri jirringrazzjaw il-Mulej li għandhom kirijiet fit-tul u dħul etern ta’ kirijiet – ħafna minnu mhux iddikjarat.
Nistgħu nkomplu nirrakkontaw il-mod kif id-dipendenza tagħna fuq il-barranin u kif dan il-pajjiż neżżajnieh minn kull forma ta’ awtentiċità. Frott aktarx ta’ Muscateconomics li nibet wara l-2013 u ġie abbraċċjat mill-maġġoranza tal-popolazzjoni Maltija.
Il-problema mhumiex il-barranin li jiġu hawn u jagħmlu xogħol li aħna ma aħniex lesti nagħmlu jew inkella m’hemm ħadd lest biex jagħmlu. Il-problema huwa l-mudell ekonomiku u l-viżjoni tal-politiċi tagħna li huma mnebbħa minn ideat Neo-Liberali fejn il-valuri ma jiswew xejn u viżjoni fit-tul hija kompletament assenti u fejn it-tkabbir ekonomiku huwa suprem.
Ma tantx nimmaġinaw li se jinbidlu l-affarijiet. Tant hu kbir l-għatx li kulħadd isir sinjur u li jiddependi fuq il-barrani. Li nistgħu nagħmlu hu li nfakkru l-pubbliku li qabel ma jirreġistra l-inkwiet tiegħu, jagħraf kemm hu ipokrita u redikolu meta jesprimi dan il-ħsieb.
More in Politika
