Albert Buttigieg | L-akkomodazzjoni soċjali u l-U turns politiċi

“Sur President, insemmi l-iskema: ‘Nikbru Biex Nassistu’ li permezz tagħha numru sabiħ ta’ familji qegħdin jgħixu fi propjetajiet li jinkrew mingħand il-privat”.  

Din hija kwotazzjoni mid-diskors tal-Baġit ta’ din is-sena f’paġna 41. Il-Ministru qiegħed jirreferi għall-iskema ‘Nibkru Biex Nassistu’ fejn il-Gvern jikri mingħand il-privat b’rata kummerċjali biex imbagħad ikun jista’ jikri (jagħmel subletting) lil inkwilini b’kirja sussidjata. 

Din l-iskema hija l-istess li kellha l-isem ta’ ‘Skema Kiri’ u li meta l-PL/Ministru kienu fl-oppożizzjoni kienu għamlu kruċjata sħiħa kontriha meta daħlet fis-seħħ! Ma nafx x’ma qalux fuqha. 

U issa? Issa qed jgħidulna ‘numru sabiħ ta’ familji qegħdin jgħixu’. U għandhom raġun li jgħidu ‘numru sabiħ’ għaliex f’risposta għal mistoqsija parlamentari tiegħi numru 2251, il-Ministru wieġeb li minn meta nfetħet din l-iskema sal-lum kien hemm 1,189 familja li bbenefikaw minn din l-iskema li l-Partit Laburista tant kien maqdar! 

Verament dak li jgħid il-Malti, li min irid imaqdar, irid jixtri!  

Filwaqt li nieħu gost li nara l-Ministru u l-Gvern Laburista biddlu fehmithom, dan juri li l-krititka tagħkom f’dak iż-żmien kienet biss kritika mibnija fuq opportuniżmu politiku. 

Imma dan l-opportuniżmu u l-inkonsistenza politika ma wrewhomx biss f’din l-iskema imma f’diversi skemi oħra li biddlulhom isimhom permezz ta’ rebranding u issa jiftaħru bihom daqslikieku x-xemx telgħet fl-2013 jew minn meta l-Ministru attwali sar ministru! 

Fil-fatt, il-Gvern qed jiftaħar li żied is-sussidji erba’ darbiet aktar milli kienu fuq l-iskema ta’ sussidju fuq il-kera mill-privat. Din hija skema fejn wieħed jikri mingħand il-privat biex imbagħad il-Gvern jgħin b’sussidju lil inkwilin. 

Tajjeb ... imma nistaqsi; il-fatt li żdied is-sussidji erba’ darbiet aktar, allura l-Gvern qed jikkonferma li hawn aktar nies fil-bżonn, li huma vulnerabbli, u li ma jistgħux ilaħħqu mal-għoli tal-ħajja?  

Xi ħadd forsi jgħidli “imma x’qed tgħid?” Skużani imma qiegħed nuża l-istess loġika, l-istess kliem, l-istess argument li d-Deputati Laburisti għamlu meta ddaħħlet propju din l-istess skema mill-Gvern Nazzjonalista? 

Fl-2006 meta daħlet din l-iskema kienu qalu dan: 

‘The increase in requests for rent subsidy for housing should worry the government since it is a reflection of a hike in the cost of living ... this confirms the tragic situation of poverty which the country is moving toward’. (TOM, 14.09.2006).  

Il-Gvern Laburista għadu bl-istess ħsieb issa jew issa din l-iskema saret sabiħa wkoll bħal Skema Kiri? 

F’dan il-baġit, il-Gvern qiegħed ukoll jiftaħar li qed jagħti għajnuna lil inkwilini ta’ qabel l-1995 fid-dawl li l-kirjiet tagħhom żdiedu. 

Hawn ngħid proset doppja lill-Gvern. Għaliex? L-ewwel nett, kull għotja ta’ għajnuna hija dejjem għajnuna kbira lil dawn l-inkwilini fid-dawl li diversi minnhom huma anzjani. It-tieni, ngħidlu proset għax qiegħed isolvi l-problema li ħoloq huwa stess meta kien fil-Gvern fis-70 u fil-bidu tat-80! 

Tajjeb infakkru li f’dawk is-snin mhux biss kien hemm Requisition Orders li kienu jinħarġu qishom pastizzi imma wkoll kien hemm il-housing decontrol ordinance fejn wieħed ma setax iżid jew jgħolli l-kera. Dan kien ifisser li l-kirjiet kienu baxxi ħafna. Xi wħud kellhom 35 Lira Maltija fis-sena bħala kera!  

Tajjeb infakkar ukoll li fl-1995, il-PN fil-gvern kien illibera s-suq, mhux biss għaċ-ċikkulata imma anke għall-kirjiet, u fl-2009 l-PN stabbilixxa l-kera minima biex din tkun ta’ inqas minn 185 Lira Maltija fis-sena!  

U tajjeb infakkar ukoll li dak iż-żmien il-PL kien għamel ukoll kruċjata sħiħa fuq din il-kera mimina ta’ 185 Lira Maltija fis-sena fejn għajjar lill-PN li qiegħed iżid il-kirjiet! 

Issa l-Gvern Laburista qiegħed jifraħ għaliex qiegħed isolvi l-problema u l-inġustizzja li ħoloq huwa stess! 

Dan kollu jikxef biss l-opportuniżmu u l-U-turns tal-Partit Laburista!