Cressida Galea | It-tkabbir ekonomiku l-ixprun għat-twettiq tal-viżjoni tal-Gvern

Dan l-aħħar stajt ninnota r-reazzjoni ta’ xi wħud meta għal darb’oħra Malta tirreġistra tkabbir ekonomiku. Reazzjoni ta’ nuqqas ta’ interess jew saħansitra ta’ negattiviżmu lejn l-istess riżultat. Ir-raġunijiet jistgħu jkunu diversi. Hemm uħud li qed jieħdu dan ir-riżultat for granted u hemm oħrajn li qed jiġu influwenzati minn narrattiva negattiva u falza li t-tkabbir ekonomiku m’għandniex bżonnu. 

Bħala persuna li ġejja mill-qasam ekonomiku ma nista’ qatt nieqaf insostni l-importanza tat-tkabbir ekonomiku.  

Dan għaliex it-tkabbir ekonomiku huwa l-bażi ta’ ħafna mid-deċiżjonijiet li jieħu l-Gvern. 

Inqabbel it-tkabbir ekonomiku mal-introjtu ta’ familja tipika. Jekk l-introjtu tal-ġenituri jikber sew, ikunu mbagħad jistgħu jinvestu aktar fit-tfal tagħhom u jaraw li ma jkun jonqoshom xejn. Bl-istess mod jekk l-ekonomija tal-pajjiż tikber, il-Gvern ikun jista’ jinvesti aktar f’niesu u fl-oqsma differenti tal-ħajja biex il-pajjiż ikun jista’ jkompli javvanza ’l quddiem. 

Nemmen li din kienet ir-riċetta ewlenija ta’ suċċess ta’ Gvern Laburista mill-2013 ’il quddiem. L-ewwel u fuq kollox ra li jkabbar l-ekonomija sabiex imbagħad ħasad il-frott ta’ dan it-tkabbir billi implimenta l-viżjoni tiegħu fuq setturi differenti. Huwa propju minħabba f’hekk li pajjiżna għamel qabżiet kbar ’il quddiem. 

Il-Gvern jirrikonoxxi li dan it-tkabbir ekonomiku ġab ukoll sfidi sekondarji, bħaż-żieda fil-popolazzjoni, fost oħrajn. Huwa għalhekk li għandna Gvern immexxi mill-Prim Ministru Robert Abela li issa jinsab qed jimplimenta politika fejn fuq naħa qed ikompli jassigura tkabbir ekonomiku primarjament b’investiment ta’ valur miżjud u fl-istess waqt jikkalibra u jindirizza sfidi li feġġew kawża ta’ dan l-istess tkabbir. Ewlenija fost dawn kienet il-Labour Migration Policy u riformi bħal dawk tat-Temping Agencies u li jindirizzaw ukoll il-platform workers.  

Hija propja din il-politika li l-Gvern irid ikompli jwettaq fix-xhur u s-snin li ġejjin. Nieħu gost nara pereżempju t-tkabbir ekonomiku li rreġistra pajjiżna ftit tal-jiem ilu u li ammonta għal 6%. Dan ifisser li l-Prodott Gross Domestiku f’pajjiżna laħħaq id-€19.2 biljun. Meta tħares lejn l-istess riżultat fil-bqija tal-Unjoni Ewropea tara li kien hemm biss żieda ta’ 1%. Notevoli wkoll kien il-livell ta’ investiment irreġistrat li laħħaq it-€3.6 biljun. Ċifra li taqbeż dik irreġistrata qabel il-pandemija b’nofs biljun ewro. 

Fl-istess waqt għandek istituzzjonijiet bħall-IMF u l-Kummissjoni Ewropea li kienu qed ibassru li l-ekonomija tagħna se tikber b’madwar 5%, li jfisser li għal darb’oħra l-ekonomija Maltija ssorprendiet lill-esperti barranin u li ma jħarsu lejn wiċċ ħadd. 

Iżda fuq kollox il-viżjoni tal-Gvern iddur mal-ixprun tal-konsum privat. Dan jikkonfermah anke l-Uffiċċju Nazzjonali tal-Istatistika hekk kif innota li ftit inqas min-nofs it-tkabbir ekonomiku kien dovut għal konsum akbar mill-familji. U dan grazzi għall-ogħla ammont ta’ dħul għall-ħaddiema li qatt ġie osservat fl-istorja hekk kif dan laħaq id-€9.3 biljun – kważi biljun aktar mid-dħul irreġistrat tul is-sena ta’ qabel. 

Għaldaqstant dawn iċ-ċifri jagħtu garanzija lill-poplu li bi Gvern Laburista se jkun qed ikollu s-serħan il-moħħ mil-lat finanzjarju u ekonomiku li jkompli jimplimenta l-manifest tiegħu flimkien ma’ aktar baġits ambizzjużi u ta’ ġid għall-poplu. 

L-aħħar baġit huwa eżempju ċar ta’ dan. Ra fuq kollox li jkompli jkun ta’ sostenn għall-poplu fejn jidħlu s-sussidji tal-enerġija minkejja pressjoni biex dawn jieqfu, saħansitra mill-Partit Nazzjonalista. Apparti minn hekk il-miżuri soċjali ma waqfux lanqas. Għal sen’oħra mill-ġdid kien hemm żieda fil-pensjonijiet, bil-Prim Ministru Robert Abela jassigura li din iż-żieda se tkun qed terġa tingħata fil-baġit tas-sena d-dieħla wkoll. Mill-ġdid rajna aktar għajnuna lil persuni b’diżabilità, aktar investiment fil-qasam edukattiv u dak tas-saħħa. Iddominat ukoll l-akbar tax-cut fl-istorja għall-ħaddiema Maltin u Għawdxin. B’kollox mal-€140 miljun fil-but tagħhom f’sena waħda biss permezz ta’ din il-miżura waħedha. Kompiet ukoll il-ħidma lejn aktar investiment fil-qasam ambjentali wara li fl-aħħar sentejn rajna mal-150,000 metru kwadru ta’ art ġiet riġenerata jew allokata bħala spazju miftuħ għall-pubbliku. Is-sena d-dieħla biss Project Green mistenni wkoll jiftaħ mad-19-il spazju miftuħ ieħor. 

Dan li semmejt huwa biss ftit mill-frott li l-poplu qed igawdi grazzi għal ħidma  li għamel, qed jagħmel u se jibqa’ jagħmel dan il-Gvern. Dan fl-istess waqt li kellu jaffaċċja sfidi kontinwi li taw xokkijiet ekonomiċi kbar, mhux biss lil pajjiżna, iżda lid-dinja kollha. Li spikka biss differenti fil-każ ta’ pajjiżna kien l-għaqal li l-Gvern ħadem bih u li permezz tiegħu llum mill-ġdid pajjiżna jinsab f’pożizzjoni finanzjarja u ekonomika b’saħħitha, kif jikkonfermaw iċ-ċifri li kkwotajt qabel. 

Il-viżjoni tal-Partit Nazzjonalista fil-qasam ekonomiku tasal biss sal-Pre-Budget Document li l-poplu jaf f’liema stat kien dan l-istess id-dokument. Il-Kap tal-Oppożizzjoni stess ħass li ma kellux biżżejjed sustanza. Għalhekk il-kredibbiltà tal-Partit Nazzjonalista fil-qasam ekonomiku ma tistax lanqas biss tibda biex tiġi kkumparata ma’ dik tal-Gvern Laburista.  

Dan ipoġġi aktar responsabbiltà fuq il-Gvern li jaġixxi b’għaqal u b’responsabbiltà. It-track record tiegħu fil-qasam ekonomiku żgur u mhux forsi jtina s-serħan il-moħħ b’rabta ma’ dan.  

Mhux l-istess jista’ jingħad għal min qed jaspira jmexxi lil dan il-pajjiż.